Miaso (Masamu) 38 - Mukanda Wa Zambi 1970

Kulemba cha mukwa lamba

¹ Aa Mwene Zambi, nalemba kanda ungumwesa lamba mu ufwatulo we!

² Mivwi ye hiyangutuwa, kwoko lie hiliangushata.

³ Ngunayiji mumu ha utenu we; mujimba wami weswe uli ni yikola mumu ha shili yami.

⁴ Ngunafu mu shili yami ngwe nguli mu sanga lia meya, hinashinana hashi mumu ha yilemu yami.

⁵ Mumu ha uhepuke wami yilonda yami yinakupuka vumba,

⁶ Ngunende ni kufumbama, ngunabinji; nakulila tangwa heswe.

⁷ Ngunachikima ni kachiki, ngunambe kufwa.

⁸ Ngunalezumuka, hijanguhwa, mbunge yami yinabinji, ngunatu mikuma.

⁹ Aa Mwene Zambi, unanyingika chize nakuzanga, unevu chize ngunatu mikuma.

¹⁰ Mbunge yami yinabinji, tachi hijahwa, meso jami halaa.

¹¹ Masepa jami ni enyembo jami kaakumana kusuku, mumu ha yilonda yami; chibwe usoko wami kaakumana kusuku.

¹² Atu waze akuzanga kungushiha kaakungutela makambwila, waze akuzanga kungulemeka kaakunguhalila; keeshi kwecha kungutwama punga.

¹³ Yami nguli ngwe kafwa matwi, chishi kwivwa, ngwe kamama yoze keshi kuhasa kuhanjika.

¹⁴ Nguli ngwe mutu yoze keshi kukumbulula mumu keshi matwi.

¹⁵ Alioze Mwene Zambi, nakushachila hali yena; mwe yena muungukumbulula.

¹⁶ Akwa kole jami kaakunguseha mumu ha lamba liami; kanda alisamba mumu ha kulimbuka chami!

¹⁷ Ngunambe kulimbuka, nguli mu lamba tangwa heswe.

¹⁸ Ngunashikisa milonga yami; ngunevu kubiha mumu ha shili yami.

¹⁹ Akwa kole jami kaali ni tachi jinji, anji akunguvutwokela chamokomoko.

²⁰ Atu waze akungufweta yibi ha yibema, kakulimika ni yami mumu nakulinga yibema.

²¹ Aa Mwene Zambi, kanda ungwehuka, Zambi yami, kanda ubwa kusuku ni yami!

²² Aa Mwene Zambi chilamwina chami, ngukwase kama haliabwila!