Miaso (Masamu) 37 - Mukanda Wa Zambi 1970

Songo lia yingulungulu ni akwa ululi

¹ Kanda ulibikala mumu hali yingulungulu; kanda wivwila ukwa waze akulinga yibi.

² Kumaakoma susumuku ngwe chize wakuma mwambu, kumaakalela ngwe mwambu wa wisu.

³ Shachila hali Mwene Zambi, ulinge yibema, twama mu uhwimino mu che chifuchi.

⁴ Wahilila muli Mwene Zambi, neye makwaha yize unazange.

⁵ Lihane kuli Mwene Zambi; shachila hali iye, neye makukwasa.

⁶ Makupwisa lume mukwa ululi, hanga ululi we usoloke ngwe pangu ha muchima tangwa.

⁷ Shimbwila Mwene Zambi, ni uhumikizo; kanda ulibikala mumu hali yoze hayuka, hanji hali yoze unawahilila mu yibi yenyi.

⁸ Kanda ulibikala, kanda wivwa wuli! Nyi ka, muyikutwala tuhu mu jila yibi.

⁹ Atu waze akushachila hali Mwene Zambi, kumaakahinga che chifuchi, alioze yingulungulu kumaakaahuma.

¹⁰ Susumuku yingulungulu kumaakatoka, muukaatala, alioze kuuchi kaamona.

¹¹ Alioze akwa kulikehesa kumaakahinga che chifuchi, maakayuka, kumaakabwa mu uhwimino.

¹² Chingulungulu kakutwama mukwa ululi punga, kakulikolotota ku mazo.

¹³ Alioze Mwene Zambi kakuseha yingulungulu, mumu kananyingika ngwenyi, tangwa lia kwamwesa lamba hiliakundama.

¹⁴ Yingulungulu kaakutomona mikwale yo ni kunana mata jo, ashihe yiswale, ni akwa lamba, ni akwa ululi.

¹⁵ Alioze mikwale yo muyikaalumukina ayo ene, ni e mata jo nawa maakaamakwoka.

¹⁶ Yuma yikepe yize mukwa ululi ali nayo yinahiana ubite unji wa chingulungulu,

¹⁷ mumu Mwene Zambi kumakanyingika tachi ja yingulungulu, alioze kumakafunga akwa ululi.

¹⁸ Mwene Zambi kakunyingika matangwa ja akwa ululi, chihinga cho muchilinduluka ndoo ku miaka yeswe.

¹⁹ Keechi kamona lamba ha matangwa ja luyinda; kumaakabwa ni yakulia ha matangwa ja zala yinji.

²⁰ Alioze yingulungulu kumaakafwa, akwa kole ja Mwene Zambi kumaakoma ngwe yitemo, kumaakatanduluka ngwe mwishi.

²¹ Chingulungulu, nyi wasondama Chuma, keshi kuchihilwisa; alioze mukwa ululi kali mukwa keke, kakuchihilwisa.

²² Atu waze Mwene Zambi hanawahisa kumaakahinga che chifuchi, alioze waze iye mwene hanaashingi kumakaahuma.

²³ Mwene Zambi kakusongwela mutu mu jila yize chamutamba kuya, kakufunga waze akuwahilila no.

²⁴ Chibwe alimbuke, keeshi kubomba shimbu lisuku, mumu Mwene Zambi maahindwisa.

²⁵ Haliabwila hinabwa kashinakaji, hingunatwama miaka yinji, alioze kanda ngumona kama Mwene Zambi mehuka mukwa ululi, chibwe ana jenyi kwita yakulia.

²⁶ Matangwa eswe kakusondamisa akwo yuma nikawashi, ni ana jenyi nawa kaakuwahisa atu.

²⁷ China yibi, linga yibema, mba vungu lie maakatwama matangwa eswe mu che chifuchi,

²⁸ Mumu Mwene Zambi kakuzanga unwenemwene, keshi kwehuka atu jenyi, kakwafunga ndoo ku miaka yeswe. Alioze vungu lia yingulungulu kumaakaahuma mu che chifuchi.

²⁹ Akwa ululi kumaakahinga che chifuchi, ni kutwama mo ndoo ku miaka yeswe.

³⁰ Mukwa ululi kakuhanjika maliji a mana, kakuhanjika maliji a umwenemwene.

³¹ Kakufunga Shimbi ja Zambi yenyi mu mbunge yenyi, keshi kujikolema.

³² Chingulungulu kakujikinyina mukwa ululi hanga amushihe;

³³ alioze Mwene Zambi kechi kumuhichika mu moko ja yingulungulu, chibwe kutayiza amubatwile.

³⁴ Sako mbunge ye kuli Mwene Zambi, funga Shimbi jenyi; makunangamisa ukahinge che chifuchi, muukamona chize Mwene Zambi makatuhwisa yingulungulu mu chifuchi.

³⁵ Hingunamono umwe chingulungulu wa tachi, te munene ngwe mutondo sedru ha mulundu wa Libano,

³⁶ munabwamuze yingubalikila ko, hi keshiko; yingumufupafupa, alioze Chamumwene.

³⁷ Tala kanawa mutu mubema, nyonga hali mukwa ululi; mukwa uhwimino kali ni vungu lienyi,

³⁸ alioze yingulungulu Mwene Zambi kumakoonona liakulu, vungu lio eswe kumakaanongesa.

³⁹ Mwene Zambi kakulamwina akwa ululi, kakwafunga ha matangwa ja lamba.

⁴⁰ Kakwakwasa ni kwapulula, kakwalamwina ku moko ja yingulungulu, mumu kaakuchinyina kuli iye hanga aswame.