Miaso (Masamu) 36 - Mukanda Wa Zambi 1970

Ungulungulu wa atu

¹ Shili yakuzondola chingulungulu; kakulituna Zambi, keshi kumulemesa.

² Kakulichichimieka ni kuhonga ngwenyi, Zambi kechi kumona yibi yenyi, kechi kumuhisa.

³ Yize akwamba yili yibi ni ya mahuza, keshi kulinga nawa yuma yibema ni ya mana.

⁴ Muze anabombo ha muhela, kakunyonga manyonga abi, keshi kulinga nawa Chuma chibema nichimwe, keshi kulituna Chuma chibi nichimwe.

Zango lia Zambi

⁵ Mwene Zambi, zango lie lize kulishi kuhwa, kuliakuheta ndoo mwilu; kushishika che ndoo ku malelwa.

⁶ Ululi we unahiana ngwe milundu yisuku, ubatwilo we wa ululi uli ngwe yimwe jondo yinene. Mwene Zambi, yena wakufunga atu ni tushitu.

⁷ Aa Zambi, twakuwahilila mu zango lie lize kulishi kuhwa! Atu ni tushitu kaakuswama mu mapulwa je.

⁸ Twakukuta ni yakulia yinji yize wakutwaha; wakutunwisa meya a utu we.

⁹ Yena uli shima lia meya a mwono, mumu ha pangu lie twakumona Pangu.

¹⁰ Nyongonona kuzanga waze akukunyingika, ni kulinga yibema kuli akwa ululi.

¹¹ Kanda utayiza akwa kulengumuka kulimika ni yami, hanji yingulungulu kunguhanga.

¹² Tala chize yingulungulu haalimbuka! Mana a kuhinduka akuhi nawa.