Miaso (Masamu) 35 - Mukanda Wa Zambi 1970

Kulemba: “Mwene Zambi ngukwase kama”

¹ Mwene Zambi, limike kama ni waze akulimika ni yami, asa jita ni waze akulitachika ni yami!

² Anda yitwa ye ya jita, wize ungulamwine.

³ Anda kunga lie, ujikinyine waze akungukaula. Ngulweze kama ngwe: “Mungukulamwina.”

⁴ Kumba atu waze akuzanga kungushiha, akumbe evwe sonyi. Waze akungutwama punga, ahilwise, abinjise.

⁵ Abwe ngwe yizungu yize yinahehuka ni fuji, muze anaahange kuli kanganda ka mwilu!

⁶ Jila yo yibwe ya milima, yibwe yasenena, muze anaalimbwila hashi kuli kanganda ka Mwene Zambi!

⁷ Haangutela Wanda, chishi kwami chitela, haangufulila wumbu nguholokele mo.

⁸ Alioze kumaafwa cha kutungumuka; muheto uze atele ayo ene maafwa mo, maaholokela mu wumbu lize afulile ayo ene.

⁹ Mba munguwahilila mumu hali Mwene Zambi; mungulikwiza mumu hangulamwina.

¹⁰ Mungwamba ni mbunge yeswe ngwami; “Kukushi niumwe walifwa ni yena! Yena wakupulula mulelu kuli chitakame, chiswale kuli mukwa kububa.”

¹¹ Atu abi kaakungushindakenya mahuza, kaakungulamikiza yuma yize Chanyingikine.

¹² Kaakungufweta yibi ha yibema, hinalekumuka.

¹³ Alioze muze ayijile yinguzala mwanji, yingulitwamina kulia, yingulihetamina nikulemba,

¹⁴ ngwe chize mungulembela sepa liami hanji mwakwetu. Yinguhetama ni chinyengo ngwe umwe yoze unalili naye.

¹⁵ Alioze muze yami nabwile mu lamba, ayo eswe yaawahilila, yaangujingilika ni kungusaula, chibwe waze te chaanyingikine, yezaza ni kungulamba.

¹⁶ Ngwe malunga waze maasaula chitonji, yaanguhulikila meso ni wuli.

¹⁷ Mwene Zambi, kuma muwatala tuhu, nyi? Ngupulule kama ku kwonona cho, ngulamwine kama kuli tambwe wano.

¹⁸ Mba mungukusakwilila mu Chikungulwila cha atu je; mungukuchichimieka ku meso jo eswe.

¹⁹ Kanda utayiza akwa kole jami, akwa mahuza waze kunguseha muze nakulimbuka. Kanda utayiza waze akunguvutwokela, chishi kwami chitela, ni kungulelesa mumu ha lamba liami.

²⁰ Keeshi kuhanjika ni yami ni zango, alioze kaakutakila akwa uhwimino yuma ya mahuza.

²¹ Kaakunguhulikila meso nikwamba ngwo; “Woloo! Woloo! Mba hitwamona yize walinga.”

²² Alioze yena Mwene Zambi hiwachimona; kanda uhola, kanda ubwa kusuku ni yami!

²³ Aa Mwene Zambi, katuka kama, unguhakwile, nalemba, Zambi yami, ngukwase kama.

²⁴ Aa Mwene Zambi yami, yena uli mukwa ululi, ngubatwile, ungusambise kanawa. Kanda utayiza akwa kole jami kunguseha.

²⁵ Kanda watayiza kulihanjikisa ngwo: “Ahaa! Puu! Chechize tunazange! Hitwamulimuna lume!”

²⁶ Chinalite waze akunguseha mumu ha lamba liami, evwe sonyi, achingashane; waze akwambamba ngwo; “Tunamuhiana ku ululi,” evwe kama sonyi kuhiana.

²⁷ Waze akuwahilila ha kusamba chami, awahilile kuhiana, akololoke nikwambamba ngwo: “Mwene Zambi afumane, kakuwahilila ha kukumba cha kavumbi kenyi.”

²⁸ Mba mungwambujola ululi we, mba mungukufumanyisa tangwa lieswe.