Miaso (Masamu) 34 - Mukanda Wa Zambi 1970

Chichimiekenu Zambi mumu ha utu wenyi

¹ Mungusakwilila Mwene Zambi matangwa eswe; mungumuchichimieka tangwa ha tangwa.

² Mungumuhalisa ha yize hanalingi; akwa lamba abanjike, awahilile!

³ Chichimiekenu unene wa Mwene Zambi hamwe ni yami, tufumanyisenu jina lienyi hamuwika!

⁴ Naliumbile kuli Mwene Zambi, neye yangukumbulula; yangutusula ku woma wami weswe.

⁵ Akwa lamba kaakumutala ni kaakuwahilila, Keechi kevwa nawa sonyi nichimwe.

⁶ Akwa lamba kaakuteta kuli iye, neye kaakwakumbulula; kakwalamwina ku lamba lio lieswe.

⁷ Kanganda ka mwilu kakufunga waze akulemesa Mwene Zambi, kaakwapulula ku utoji.

⁸ Pakenu nutale yenwene, numone ubeme wa Mwene Zambi. Kawaha yoze wakuchinyina kuli iye!

⁹ Lemesenu Mwene Zambi yenu atu jenyi eswe. Eswe waze akumulemesa keechi kahona nichimwe.

¹⁰ Chibwe mievu ja tambwe kaakufulwa ni kaakwiwa zala; Alioze waze akwononokena Mwene Zambi keeshi kufulwa chuma chibema nichimwe.

¹¹ Akweze jami, tweyenu, nungubanjike, mungunulongesa kulemesa Mwene Zambi.

¹² Nunazange kumona yibema mu mwono wenu? Nunazange mwono wa matangwa anji ni uwahililo?

¹³ Mba lifungenu, kanda nuhanjika yibi ni mahuza.

¹⁴ Chinenu yibi, nulinge yibema; fupenu uhwimino ni mbunge jenu jeswe.

¹⁵ Mwene Zambi kakutala akwa ululi, kakubanjika miteto yo;

¹⁶ alioze kakulimika ni waze akulinga yibi, hanga muze maafwa atu keechi keewuluka.

¹⁷ Akwa ululi kaakuteta kuli Mwene Zambi, neye kakwabanjika; kakwapulula ku lamba lio lieswe.

¹⁸ Mwene Zambi kali hehi ni waze haahonga, kakulamwina waze akwivwa kubiha kuhiana.

¹⁹ Mutu mubema kakumona lamba linji, alioze Mwene Zambi kakumulamwina ku lamba lienyi Heswe.

²⁰ Mwene Zambi kakumufunga kanawa; chifwaha chenyi chibwe chimuwika kuchishi kumakuka.

²¹ Yibi muyishiha chingulungulu, waze akuvwila akwa ululi kole, kumaakamwesa lamba.

²² Mwene Zambi makula tuvumbi twenyi; waze akuswama muli iye, niumwe kechi kuhia.