Miaso (Masamu) 33 - Mukanda Wa Zambi 1970

Chichimiekenu Mwene Zambi

¹ Yenu akwa ululi eswe, wahililenu mumu ha yeswe yize Mwene Zambi halinga; muchichimiekenu, yenu eswe nwakumwononokena.

² Sakwililenu Mwene Zambi ni tulialia akepe akepe, mwimbilenu ni kumuhalisa ni tulialia anene anene.

³ Mwimbilenu mwaso Waha, imbenu tulialia ni mana ni kukololoka!

⁴ Maliji a Mwene Zambi kaali amwenemwene, ni yeswe yize hanalingi muyilinduluka.

⁵ Mwene Zambi kakuzanga ululi ni ubeme, zango lienyi lize kulishi kuhwa, linamoneka hashi heswe.

⁶ Mwene Zambi yamba ngwenyi: “Tangwa ni kakweji ni matongonoshi yibwe.” Neyo yiibwa.

⁷ Iye yakunga meya eswe a kalunga lwiji muma mumuwika. Yatulika meya a mu njondo homa lio.

⁸ Akwa hashi heswe wilenu Mwene Zambi woma! Atu eswe mulemesenu!

⁹ Mwene Zambi yamba ngwenyi: “Hashi ni yuma yaho yibwe.” Neyo yiibwa.

¹⁰ Mwene Zambi, yiyulo ya mavungu kakuyipwisa yamokomoko; kakwakanjisa, kanda alinga chize ananyongo.

¹¹ Alioze manyonga jenyi kaakulinduluka lume, yiyulo yenyi kuyakola ndoo ku miaka yeswe.

¹² Kawaha vungu lize Zambi kali Mwene wo; kawaha atu waze alitongwelele iye mwene!

¹³ Mwene Zambi mwilu kakutala hashi; kakumona mavungu eswe.

¹⁴ Kuma kuze akutwama kakutala atu eswe.

¹⁵ Iye wakululika mbunge ja atu, kakunyingika yuma yeswe yize akulinga.

¹⁶ Mwanangana keshi kukumba ku tachi ja tujita twenyi; chitakame keshi kukumba ku tachi jenyi mwene.

¹⁷ Tuvwalu a jita keeshi kukumba ene, Tachi jo jinji kujahashile kulamwina atu.

¹⁸ Mwene Zambi kakutala waze akumulemesa, waze akushachila ha zango lienyi lize kulishi kuhwa.

¹⁹ Kakwalamwina ku kufwa; kakwafunga ha tangwa lia zala yinji.

²⁰ Twakusa mbunge kuli Mwene Zambi; kali chikwashi chetu kanda lukebwe wetu.

²¹ Twakuwahilila mumu hali iye; twakumusa mbunge.

²² Mwene Zambi, utuzange kama ni zango lie lize kulishi kuhwa, twakukusa mbunge.