Miaso (Masamu) 32 - Mukanda Wa Zambi 1970

Zambi kakukonekena yoze halumuka ku mbunge

¹ Kawaha waze Zambi hanaakonekena shili yo, waze hanaajimuna milonga yo.

² Kawaha mutu yoze Mwene Zambi keshi kumwalwila milonga yenyi, yoze keshi ni kalimbalimba.

³ Muze te kanda nguchishikisa shili yami, nakuhonga mumu te nakulila tangwa heswe.

⁴ Mwene Zambi, mwalwa ni ufuku te wakungumwesa lamba, tachi jami te hijanguhwa, ngwe ha changa cha lushiho.

⁵ Mba yingushikisa shili yami kuli yena; chakuswekelele ko uhenge wami. Nabatwile ngwami, munguyishikisa kuli yena, ni yena yiungukonekena yo yeswe.

⁶ Ha chino, akwa kukuwayila eswe chaatamba kulemba ha tangwa lia lamba. Chibwe sanga lia meya muliasupwokela, kulichi kwaaheta.

⁷ Yena uli chiswamo chami, muungulamwina mu lamba. Mungukwimbila ni tachi ha chize hiwangulamwina, mumu wakungufunga.

⁸ Mwene Zambi kanambe ngwenyi: “Mungukulongesa jila yize Chakutamba kuya; mungukusongwela ni kukutala ni liso liami.

⁹ Kanda ubwa chihepuke ngwe kavwalu, hanji chimbulu, ha kumuhombola chatamba kumusa chikungo mu kanwa ni muhipu wa kumukwata nawo.”

¹⁰ Yingulungulu maamona lamba; alioze waze akushachila hali Mwene Zambi, maafunga kanawa ni zango lienyi lize kulishi kuhwa.

¹¹ Yenu akwa ululi, wahililenu, likwizenu, mumu ha yeswe yize Mwene Zambi halinga. Eswe nwakumwononokena, kololokenu ni chiseke!