Miaso (Masamu) 31 - Mukanda Wa Zambi 1970

Kushachila hali Zambi

¹ Aa Mwene Zambi, muli yena ngunaswame, kanda utayiza akwa kole kungukumba. Yena uli Zambi ya ululi, ngulamwine kama.

² Ngubanjike, ngulamwine nikawashi. Bwako kama liwe liami lia kuswama, zuwo liami lia kukoleka lia kungulamwina.

³ Yena uli liwe liami ni zuwo liami lia kukoleka, tetekela, ungusongwele mumu ha ulemu wa jina lie.

⁴ Ngufunge kama ku kambwila lize haangutela, mumu yena uli tachi jami.

⁵ Ngunalikunjika mu moko je, Mwene Zambi, yena muungulamwina, mumu yena uli mukwa kushishika.

⁶ Yena wakuvutwokela waze akuwayila mazambi amokomoko, alioze yami nakushachila hali yena.

⁷ Munguwahilila ni kulikwiza, mumu ha zango lie lize kulishi kuhwa. Unamono luyinda wami, Unanyingika lamba liami.

⁸ Kuwatayijile akwa kole jami kungukumba; hiwangutusula hanga nguye kuze ngunazange.

⁹ Mwene Zambi, nguvwile kama keke, mumu nakumona lamba, meso jami haajimbajimba mumu nakulila chinji, Hijanguhwa! Hinahonga kuhiana!

¹⁰ Hijanguhwa ni che kulila, hinawangama ni chinyengo. Tachi jami hijatepuluka ni luyinda, chibwe yifwaha yami hiyalela.

¹¹ Akwa kole jami eswe, chibichibi enyaho, kaakunguchoka. Eswe waze angunyingika kaakunguvwila woma, muze akungumona mu jila kaakunguchina.

¹² Eswe haanguchiza mbunge ngwe nguli mufu; nguli ngwe Chuma chize atu haambila.

¹³ Ngunevu kulinyinyita cha akwa kole anji, nguneevwila woma sali ni sali. Kaanangutwama punga ya kungushiha.

¹⁴ Alioze nakushachila hali yena Mwene Zambi; yena uli Zambi yami.

¹⁵ Yena wakungufunga matangwa eswe; ngulamwine kama kuli akwa kole jami, kuli waze akunguhungumiona.

¹⁶ Nguli kavumbi ke, ungutale kama ni utu we; ngulamwine kama, mumu zango lie kulishi kuhwa.

¹⁷ Mwene Zambi, ngunakutambika, kanda utayiza akwa kole kungukolesa sonyi; yingulungulu akevwe sonyi; ahole kuluu ni kupalumuka muma mwa afu.

¹⁸ Holesa akwa mahuza waze, akwa kulengumuka ni akwa kulisuta eswe, waze akulamikiza akwa ululi.

¹⁹ Yiwape yinji waswekela atu waze akukuvwila woma, Eswe kaakunyingika utu we, ni chize wakufunga waze akushachila hali yena.

²⁰ Wakwafunga hehi ni yena mwene kuli atu waze akwatwama punga; wakwafunga ku kulamikiza cha akwa kole jo.

²¹ Chichimiekenu Mwene Zambi! Hangulweza zango lienyi liahiana, muze nabwile ngwe limbo lize haajingilika kuli tujita.

²² Nevwile woma, nanyongene ngwami, hanguhuma ku meso jenyi. Alioze muze natetele, yevwa liji liami.

²³ Zangenu Mwene Zambi, yenu akwa kulinanga jenyi eswe! Mwene kakufunga akwa kushishika, alioze kakumwesa lamba akwa kulengumuka ngwe chinalite.

²⁴ Takamenu, hamukenu, yenu eswe nwakusa mbunge kuli Mwene Zambi.