Miaso (Masamu) 30 - Mukanda Wa Zambi 1970

Kuchichimieka Mwene Zambi

¹ Mwene Zambi ngunakufumanyisa mumu hiwangulamwina, kuwatayijile akwa kole jami kungukekuna.

² Aa Mwene Zambi yami, natetele kuli yena ni yena yiunguwuka.

³ Yena wangupulwile ku kufwa. Nambile kupalumuka muma mwa afu, alioze yena yiuhilwisa mwono wami.

⁴ Imbilenu Mwene Zambi uhaliso, yenu atu jenyi akushishika! Iwulukenu chize mwe Munangi hanalingi, musakwililenu!

⁵ Utenu wenyi wakuhwa nikawashi, alioze utu wenyi wakulinduluka ku miaka yeswe ya mwono wetu. Masoji maahasa kulundumuka ha ufuku, alioze kukololoka cha uwahililo muchiza chichamene.

⁶ Ha matangwa jami a uhwimino, nambile ngwami: “Atu keechi kungukumba nichimwe.”

⁷ Aa Mwene Zambi, mu utu we, wangufungile ku utoji ngwe nguli mu zuwo ha kukoleka ha mulundu. Alioze yiuswama mba yingwivwa woma.

⁸ Aa Mwene Zambi, natetele kuli yena; naliumbile ngwami: “Ngukwase kama.

⁹ Chika muuyuka ha kufwa chami? Nyi nafwa, chika muwanda ho? Afu maahasa kukuchichimieka, nyi? Maahasa kwambujola utu we Wahiana, nyi?

¹⁰ Aa Mwene Zambi, ngubanjike, unguvwile kama keke! Aa Mwene Zambi, ngukwase kama!”

¹¹ Hiwalumuna kulila chami kubwa kuhangana cha uwahililo; hiwanguzula mianji, hiwangujika mahina abema.

¹² Ha chino chichi kuhola, mungukwimbila uhaliso. Aa Mwene Zambi, yena uli Zambi yami, mungukusakwilila matangwa eswe.