Miaso (Masamu) 3 - Mukanda Wa Zambi 1970

Kulemba cha chichamene: “Mwene Zambi ngukwase kama”

¹ Mwene Zambi, akwa kole jami hoka naye, anji anangukatukila!

² Kaakwambamba hakutwala kuli yami ngwo: “Zambi kechi kumulamwina.”

³ Alioze yena Zambi uli lukebwe wami, wakungufunga ku utoji; wakungukwasa kukumba, wakunguhetula.

⁴ Nakuteta ku meso ja Mwene Zambi hanga angukwase, neye ha mulundu wenyi wa chijila kakungukumbulula.

⁵ Nakubomba, nakuya tulo, nakuhinduka, mumu Mwene Zambi mwe wakungufunga.

⁶ Chishi kwivwa woma chibwe tununu twa akwa kole kaanangujingilika.

⁷ Mwene Zambi tweya! Ungulamwine kama, Zambi yami! Wakulamba mbangala akwa kole jami eswe, wakubukula mazo ja yingulungulu eswe.

⁸ Mwene Zambi kakulamwina atu. Wahisa kama atu je!