Miaso (Masamu) 29 - Mukanda Wa Zambi 1970

Mwene Zambi yahanjika mu chijimbi

¹ Yenu tunganda twa mwilu, halisenu Mwene Zambi; chichimiekenu uhenya wenyi ni ndundo jenyi.

² Fumanyisenu jina lienyi lilemu, fulamanenu ku meso ja mwe Munangi mu uhenya wenyi.

³ Liji lia Mwene Zambi linahiohio ha kalunga lwiji, Zambi ya uhenya kanakulunguza, Liji lienyi linahiohio ha kalunga lwiji munene.

⁴ Liji lia Mwene Zambi linahiohio ni ndundo jalio ni uhenya walio.

⁵ Liji lia Mwene Zambi liakubula mitondo sedru ya Libano liakuyibatwola tuyipinji.

⁶ Ku tachi jenyi milundu ya Libano yakutumbwoka ngwe mwana ngombe, mulundu wa Hermone ngwe mwana mbau.

⁷ Liji lia Mwene Zambi hakutuma njaji.

⁸ Liji lienyi liakunyikisa puya, kuliakunyikisa puya ya Kadeshe.

⁹ Liji ha Mwene Zambi liakusemesa kai kuliakuhulula mitondo ya mu mishitu muze atu eswe mu zuwo lienyi akukololoka ngwo: “Fumanyisenu Zambi!”

¹⁰ Mwene Zambi kakuyula ha jinga ha meya; kumabwa mwanangana ku miaka yeswe.

¹¹ Mwene Zambi kakutakamisa atu jenyi, kakwawahisa ni uhwimino.