Miaso (Masamu) 28 - Mukanda Wa Zambi 1970

Kulemba: “Mwene Zambi ngukwase kama”

¹ Aa Mwene Zambi, yena uli liwe liami lia kuswama, banjika kulila chami. Nyi kuwangukumbulwile, mungubwa mukachi ka waze akuya muma mwa afu.

² Ngubanjike muze ngunatete, ungukwase muze ngunolola moko jami ku zuwo lie lia chijila.

³ Kanda unguhisa hamwe ni yingulungulu, hamwe ni waze akulinga yibi, atu waze akwete maliji abema, alioze mu mbunge jo kaakuvutwoka atu akwo.

⁴ Amwese lamba mumu ha yize haanalingi, mumu ha ungulungulu wo. Amwese lamba mumu ha yitanga yo, amwese lamba lize linalite.

⁵ Ayo keeshi kulemesa yuma yize Zambi atangile, chibwe yize alingile; kashika maamwesa lamba ni kwoonona ndoo ku miaka yeswe.

⁶ Fumanyisenu Mwene Zambi, mumu habanjika kulila chami hanga angukwase.

⁷ Mwene Zambi kakungufunga, kali lukebwe wami; nakushachila hali iye. Kakungukwasa, kakunguwahisa; nakumufumanyisa ni miaso ya uwahililo.

⁸ Mwene Zambi kakutakamisa atu jenyi, kakufunga mwanangana yoze hanatongola.

⁹ Lamwina kama atu je, wahisa waze nie. Bwako kafunga ko, waafunge ndoo ku miaka yeswe.