Miaso (Masamu) 27 - Mukanda Wa Zambi 1970

Kushachila hali Zambi ni kumulemba akwase

¹ Mwene Zambi kali ndeya yami kanda chilamwina chami; iya munguvwila woma? Mwene kakungufunga ku utoji weswe; iya mangukolesa mwongo?

² Muze akwa kole jami akungukundama ngwe tushitu ayilianyi, kaakutalinga ni kulimbuka.

³ Chibwe yizavu ya tujita muyingujingilika, chichi kwivwa woma; chibwe akwa kole jami maalitachika ni yami, hindu mungushachila hali Zambi.

⁴ Chuma chimuwika hingunahulu Mwene Zambi, chuma chimuwika lume ngunazange; kutwama mu zuwo lia Mwene Zambi matangwa eswe, ni kutala uhenya wenyi, ni kumwita hanga angusongwele.

⁵ Ha tangwa lia lamba mangusweka, mangufunga ku utoji mu zuwo lienyi lia chijila, mangunangamisa ha liwe linene.

⁶ Kashika mungukumba akwa kole jami waze anangujingilika. Mungumulambula milambu ni uwahililo mu zuwo lienyi, mungwimba ni kuhalisa Mwene Zambi!

⁷ Mwene Zambi ngubanjike muze ngunatete! Nguvwile kama keke, ungukumbulule!

⁸ Muze yena wambile ngwe: “Tweya unguwayile.” Yingukumbulula ngwami: “Mwene Zambi, nguneza,

⁹ kanda unguswamina!” Kanda ungutenukina, kanda unguhanga yami kavumbi ke. Yena uli chikwashi chami, kanda ungumbila, kanda ungwehuka, aa Zambi, chilamwina chami!

¹⁰ Chibwe tata ni mama maangwehuka, hindu Mwene Zambi mangufunga.

¹¹ Mwene Zambi, ngulongese, ngulweze chize unazange ngulinge, ngusongwele kama mu jila yoloka, mumu hali akwa kole jami.

¹² Kanda ungukunjika kuli akwa kole jami, waze ananguhalila ni kungulamikiza.

¹³ Ngunanyingika ngwami, mungumona utu wa Zambi mu mwono uno.

¹⁴ Shachila hali Mwene Zambi! Fuliela, kanda ulekumuka. Shachila hali Mwene Zambi.