Miaso (Masamu) 24 - Mukanda Wa Zambi 1970

Mwene Zambi kali mwanangana munene

¹ Hashi ni yeswe yize yiliho yili ya mbala ya Mwene Zambi; hashi ni eswe waze atwama ho kaali nienyi.

² Iye watangile he hashi ni kalunga lwiji, yasa fundamentu yize yili mushi lia mavu mu majinga a kalunga lwiji.

³ Iya mahasa kukanduka ha mulundu wa Mwene Zambi? Iya mahasa kunjila mu zuwo lienyi lia chijila?

⁴ Shina yoze uli ni mbunge yimuwika ni yitanga ya ululi, yoze keshi kukombelela mahamba, yoze keshi kulishinga ni mahuza.

⁵ Mwene Zambi mamuwahisa ni kumulamwina, Zambi mamusambisa kanawa.

⁶ Chenacho abwa atu waze akwiza kuli Zambi, waze akwiza ku meso ja Zambi ya Yakoba.

⁷ Azululenu yajilo ya ku chipanga azululenu ku yikolo yikulu, mba mwanangana munene manjila mo.

⁸ Mwe mwanangana munene iya? Mwene Zambi mukwa ndundo, Mwene Zambi mukwa kukumba.

⁹ Azululenu yajilo ya chipanga azululenu ku yikolo yikulu mba mwanangana munene anjile mo.

¹⁰ Mwe mwanangana munene iya? Mwene Zambi Mukwa Ndundo Jeswe, iye mwe Mwanangana!