Miaso (Masamu) 22 - Mukanda Wa Zambi 1970

Kulila cha chinyengo ni mwaso wa kuhalisa

¹ Zambi yami, Zambi yami, kuchi mba hiwangwehuka? Hingunalili chinji ungulamwine, hindu kuwangukwashile.

² Zambi yami, ha mwalwa nakuteta kuli yena, alioze kuushi kungukumbulula, nakuteta ha ufuku, chishi kuhwima.

³ Hindu yena munangi wakutwama ha chitwamo che cha wanangana, Aisraele kaakukuhalisa.

⁴ Tushakulu twetu yaashachila hali yena, yaakufuliela ni yena yiwaalamwina.

⁵ Yaakutambika, mba yiwaalamwina ku utoji; yaakufuliela, keevwile ko sonyi.

⁶ Alioze yami hi nguli nawa mutu ko, hi nabwa ngwe musangwinya, atu eswe kaakunguchoka ni kungulelesa.

⁷ Eswe waze akungumona kaakunguseha, kaakulelumiona malimi jo ni kuhungisa mitwe yo.

⁸ Kaakwamba ngwo: “Wafulielele Mwene Zambi, kuchi kasolo kukulamwina? Nyi kakukuzanga, kuchi mba kasolo kukukwasa?”

⁹ Alioze yena wangukwashile ha kusemuka, ni muze nabwile mwana kemba wangukwashile kanawa.

¹⁰ Te nakushachila hali yena chize ku kusemuka chami, matangwa eswe te uli Zambi yami.

¹¹ Kanda ubwa kusuku ni yami! Lamba lili hakamwihi, kukushi niumwe yoze mangukwasa.

¹² Akwa kole jami anji kaanangujingilika ngwe makuji a ngombe, eswe kaananguseleka, ngwe makuji a ngombe asasu a ku chifuchi cha Bashane.

¹³ Kaanangubakwila makanwa ngwe tambwe, kaanangubwozela ni kunguwumbula.

¹⁴ Tachi jami hijahwa, ngwe meya waze anamwanganyina hashi, yifwaha yami yeswe hiyasengunwoka, mbunge yami hiyasangunuka ngwe Sela.

¹⁵ Muliwu wami hiwoma ngwe chibalubalu cha ndeho (yimbia), limi liami hilialamata ku mbangachi. Hiwangwecha ngufwile mu fufuta.

¹⁶ Mbunga ya yingulungulu kaanangujingilika, ngwe mbunga ya tuwa kaanangujikinyina, kaanangusumasuma ku moko ni ku molu.

¹⁷ Yifwaha yami yeswe yinamoneka. Akwa kole jami kaanangutale ni kunguhulikila meso.

¹⁸ Kaanate chela mumu ha mahina jami, kaanalianyina, kaanaliteteloo.

¹⁹ Aa Mwene Zambi kanda ubwa kusuku ni yami! Lipupwise kama ungulamwine.

²⁰ Ngulamwine kama ku mukwale wa jita, ngulamwine kuli tuwa.

²¹ Ngulamwine kama kuli tambwe wano, chishi tachi ja kulimika ni mbau wano atenuka.

²² Mungwambulwila atu jami yize hiunalingi, mungukuhalisa mukachi ka chikungulwila cho ngwami:

²³ “Yenu tuvumbi twa Mwene Zambi muhalisenu! yenu vungu lia Yakoba muchichimiekenu, yenu vungu lia Israele muvwilenu woma!

²⁴ Mumu keshi kuhula yiswale mu lamba lio; keshi kwoomba nyima, alioze kakwakumbulula muze akumutambika hanga aakwase.”

²⁵ Mungukuhalisa mu Chikungulwila chinene mumu ha yize hiwangulingila; mungukulambula milambi yize nalakenyene ku meso ja waze akukuvwila woma.

²⁶ Yiswale kumaakalia ni kukuta ngwe chize anazange, waze akwiza kuli Mwene Zambi maamuchichimieka, kumaakayuka ndoo ku miaka yeswe!

²⁷ Mavungu eswe kumeewuluka Zambi, kumaatewuluka kuli iye; Mavungu eswe kumaamuwayila.

²⁸ Mwene Zambi kali mwe mwanangana, kakuyula akwa hashi eswe.

²⁹ Akwa kulengumuka eswe kumaakafukama ku meso jenyi, atu eswe kumaakafulamana ku meso jenyi.

³⁰ Yisemuko yize maakasula ho maakawayila Mwene Zambi, atu kumaakambujola sango ja Mwene Zambi ku Chisemuko chize muchikeza ho.

³¹ Atu waze kanda achisemuka, maakaalumbunwina nikwamba ngwo: “Mwene Zambi hanalamwina atu jenyi.”