Miaso (Masamu) 21 - Mukanda Wa Zambi 1970

Uhaliso: mumu Zambi hakwasa kukumba

¹ Aa Mwene Zambi, mwanangana kanawahilila, mumu yena hiwamutakamisa, kanawahilila, mumu hiwamukwasa kukumba.

² Hiwamwaha chize azangile, kuwamuminyine chize echile.

³ Hiwamubatwiza ni yiwape yahiana, hiwamujika chipangula cha oru.

⁴ Yeta mwono yiumwaha wo, mwono wa miaka yinji.

⁵ Hiwamukwasa, kashika kali ni uhenya Wahiana, ni ulemu ni ulamba.

⁶ Wakumuwahisa ku miaka yeswe, kakuwahilila mumu yena uli hamwe nenyi.

⁷ Mwanangana kakushachila hali Mwene Zambi, Mukwa Ndundo Jeswe; kechi kakokoloka mu wanangana wenyi, mumu zango lia Mwene Zambi kuli iye kulishi kuhwa.

⁸ Mwanangana makakwata akwa kole jenyi eswe, makakwata eswe waze akumuvutwokela.

⁹ Muze makasoloka makoonona ni kahia kakulekwoka. Mwene Zambi makoonona ni ufwatulo wenyi, ke kahia mukaakalesa.

¹⁰ Vungu lio lieswe mulikakuwa. Mwanangana makaashiha eswe.

¹¹ Kaakumutwama punga, alioze keechi kakumba.

¹² Neye kumaakaasa mivwi yenyi, akatewuluke akachine.

¹³ Mwene Zambi tunakuchichimieka mumu ha ndundo je jahiana! Mutwimba ni kuhalisa ndundo je.