Miaso (Masamu) 20 - Mukanda Wa Zambi 1970

Kulemba: “Mwene Zambi ngukwase kama ngukumbe”

¹ Mwene Zambi akukumbulule kama ha tangwa lia lamba! Zambi ya Yakoba akufunge!

² Kuze ku zuwo lienyi akukwase, haze ha mulundu wa Zione akutakamise.

³ Atambule kama yawana ye yeswe, awahilile ni milambu ye yeswe.

⁴ Akwehe yize wakuzanga, amanunune manyonga je eswe.

⁵ Mba mutukololoka ni uwahililo mumu ha kukumba che, mutumika bendelo lietu mu jina lia Zambi yetu, Mwene Zambi akulingile yeswe yize wakumwita.

⁶ Haliabwila ngunanyingika ngwami, Mwene Zambi kakukwasa mwanangana yoze atongwele kukumba. Kakumukumbulula muze mwilu lienyi atwama mwa chijila, kakumukwasa kukumba kuhiana ni ndundo jenyi.

⁷ Atu eswe kaakushachila ha matemba jo, akwo ha tuvwalu two, alioze yetu twakushachila ha ndundo ja Mwene Zambi yetu.

⁸ Ayo maatalinga, maalimbwoka, alioze yetu mutukatuka, mutumana nguu.

⁹ Aa Mwene Zambi, mwanangana akumbe, tukumbulule kama muze mutukutambika.