Miaso (Masamu) 2 - Mukanda Wa Zambi 1970

Mwanangana yoze Zambi hanawayisa maji

¹ Mumu yika mavungu anabinjisa ni kutwama punga jamokomoko?

² Mianangana jo haalilulika kwasa jita, akwa kuyula jo kaanatwama Mwene Zambi punga ni mwanangana yoze awayishile maji.

³ Kaanambe ngwo: “Tubatulenu ngoji jo, tutusukenu mu chiyulo cho!”

⁴ Alioze Mwene Zambi mwilu, ha chitwamo chenyi cha wanangana, kanaasehe, kanaalelesa.

⁵ Kanaakanjisa ni utenu, ni kweevwisa woma ni ufwatulo wenyi.

⁶ Ngwenyi: “Hingunawayisa mwanangana wami maji, ha Zione, mulundu wami wa chijila.”

⁷ Mwe mwanangana kanambe ngwenyi: “Mungulumbunwina atu yuma yize Mwene Zambi hanangulweze, ngwenyi: ‘Yena uli mwanami; hinakusema musono uno.

⁸ Ngwite mba mungukakwaha mavungu eswe, hashi heswe muhabwa ha yena.

⁹ Kumuukayula atu ni lukanda wa utale, muukaafwenya ngwe chize mutu akufwenya yikashi ya tengi.’ ”

¹⁰ Haliabwila yenu mianangana ngubanjikenu, yenu akwa kuyula a hashi kanyamenu.

^11-12 Lingilenu Mwene Zambi ni woma; chikimenu, fukamenu ku meso jenyi. Nyi ka, mevwa ufwatulo nikawashi, munufwa susumuku. Kawaha eswe waze akuswama muli iye.