Miaso (Masamu) 17 - Mukanda Wa Zambi 1970

Kulemba cha mukwa ululi

¹ Aa Mwene Zambi, banjika kama kulemba chami, ungubatwile ni ululi; ivwa kulila chami, ungukwase! Banjika kama kulemba chami cha mbunge yimuwika.

² Muungusambisa kanawa, mumu yena Unanyingika umwenemwene.

³ Unanyingika mbunge yami. Hiunanguhete ha ufuku, hiunangweseka liakulu, kuwawanyine chibi nichimwe muli yami.

⁴ Chishi kuhanjika chibi ngwe atu akwo, hingunafungu Shimbi je, chishi kushiha kwami atu.

⁵ Matangwa eswe nakukaula jila ye, chapiangukile ko nichimwe.

⁶ Aa Zambi, nakulemba kuli yena, mumu wakungukumbulula. Kashika tewuluka, ubanjike maliji jami.

⁷ Tulweze zango lie liahiana, tulamwine kama. Nyi tuli hehi ni yena akwa kole jetu keechi kutulinga nichimwe.

⁸ Ngufunge kama ngwe chize mutu akufunga meso jenyi, ngufunge ngwe chize chali akufunga ana mu mapulwa jenyi,

⁹ ku kubinjisa cha yingulungulu. Akwa kole jami haangujingilika.

¹⁰ Keeshi keke, kaakuhanjika ni kulengumuka.

¹¹ Kaakungujingilika kweswako ngunatewulukila, kaakufupa mana a kungulimbwisa hashi.

¹² Kaali ngwe tambwe waze anazange kungupapulula, ngwe mievu a tambwe waze ananguswamina.

¹³ Aa Mwene Zambi, katuka kama, ulimune akwa kole jami, waalimbwile hashi! Ngulamwine kama ni mukwale we kuli chingulungulu.

¹⁴ Ngulamwine kama ku moko ja waze ali ni yuma yeswe yize anazange. Amwese lamba lize hiunaatongwela, lamba lize liholokele hali ana jo, ndoo ni kuli ajikulu jo!

¹⁵ Alioze yami, mu ululi, mungukamona meso je; muze mungukalaula, mungukawahilila ni kukumona chize ubwa.