Miaso (Masamu) 16 - Mukanda Wa Zambi 1970

Kulemba cha ufulielo

¹ Aa Zambi, ngufunge kama, mumu nakuswama muli yena.

² Hinamba kuli Mwene Zambi ngwami: “Yena uli mwata wami, yiwape yeswe yize nguli nayo ya kuli yena.”

³ Atu ja Zambi kaali abema kuhiana! Nakuwahilila ni kubwa hamwe no.

⁴ Atu waze akukaula mazambi akwo, kaakulikokela lamba ayo ene. Chichi kulambula milambu hamwe no, chichi kuwayila mazambi jo.

⁵ Mwene Zambi, yena uli kuyuka chami, wakungwaha yeswe yize nakuhona, mwono wami uli mu moko je.

⁶ Yiwape yize wakungwaha yinabeme, kuyahiana kubema!

⁷ Ngunasakwila Mwene Zambi mumu kakungusongwela; ha ufuku mbunge yami yakungufumba.

⁸ Matangwa eswe nakunyingika ngwami, Mwene Zambi kali hamwe ni yami, kali ku chindume chami, chichi kukokoloka nichimwe.

⁹ Kashika nakuwahilila ni kusakwilila, nakumana nguu mu uhwimino,

¹⁰ mumu wakungufunga ku tachi ja kufwa, kuuchi kutayiza munangi we kubola.

¹¹ Yena muungulweza jila yize yatwala ku mwono. Nakuwahilila nyi nguli ku meso je, munguwahilila ko ndoo ku miaka yeswe.