Miaso (Masamu) 149 - Mukanda Wa Zambi 1970

Chichimiekenu Mwene Zambi

¹ Chichimiekenu Mwene Zambi! Mwimbilenu Mwene Zambi mwaso Waha, muhalisenu mu Chikungulwila cha atu jenyi!

² Aisraele, wahililenu, mumu kali tangi yenu; likwizenu akwa Zione, mumu kali mwanangana wenu!

³ Mufumanyisenu ni kawino; imbenu ngoma ni tulialia, numuchichimieke.

⁴ Mwene Zambi kakuwahilila ni atu jenyi, kakulemesa akwa kulikehesa kakwakwasa kukumba.

⁵ Atu ja Zambi awahilile mumu haakumba, embe ni uwahililo chibwe ha ufuku.

⁶ Akololoke muze anachichimieka Zambi, ni mikwale mu moko jo,

⁷ hanga akumbe mavungu akwo ni kwamwesa lamba,

⁸ hanga akase akwa kuyula ni mianangana jo ni ngoji ja utale,

⁹ hanga amwese mavungu akwo lamba ngwe chize ambile Mwene Zambi. Chenacho Mwene Zambi akukwasa atu jenyi kukumba. Chichimiekenu Mwene Zambi!