Miaso (Masamu) 148 - Mukanda Wa Zambi 1970

Atu eswe ni yuma yeswe chichimiekenu Mwene Zambi

¹ Chichimiekenu Mwene Zambi! Yenu akwa mwilu, chichimiekenu Mwene Zambi!

² Yenu tunganda twa mwilu eswe muhalisenu, yenu tujita twenyi eswe a mwilu muchichimiekenu.

³ Tangwa ni kakweji ni matongonoshi, muhalisenu.

⁴ Mwilu ni meya eswe waze alimo, muchichimiekenu.

⁵ Ayo eswe ahalise jina lia Mwene Zambi! Iye yamba liji mba yiibwa.

⁶ Iye waasele muma lio.

^7-8 Yenu yuma ya hashi, tushitu anene anene, tulunga lwiji eswe, muhenyo ni vula ya chiwe, ni neve (neige) ni malelwa, ni kangonga ka fuji yoze wakumwononokena, yenu eswe chichimiekenu Mwene Zambi!

^9-10 Yenu mindundena ni milundu, ni mitondo ya mihuko ni ya mu mushitu, tushitu eswe a ha chihunda ni a mu yambu, ni tupela, ni tujila, yenu eswe halisenu Mwene Zambi!

^11-12 Yenu mianangana ni atu eswe, yenu ana ja mianangana ni miata eswe akwo, ni yenu ana mapwo, ni ana malunga, ni yenu tushinakaji, ni twanuke, yenu eswe chichimiekenu Mwene Zambi!

¹³ Ayo eswe achichimieke jina lia Mwene Zambi! Jina lienyi linahiana majina eswe akwo; uhenya wenyi unahiana wa hashi ni wa mwilu.

¹⁴ Atu jenyi, Aisraele waze akuzanga kuhiana, hanaatakamisa, hanga ayo eswe akamuchichimieke. Halisenu Mwene Zambi!