Miaso (Masamu) 147 - Mukanda Wa Zambi 1970

Chichimiekenu Zambi Mukwa Ndundo Jeswe

¹ Chichimiekenu Mwene Zambi! Chinabeme kwimbila Zambi yetu, chinalite, chinawaha kumuchichimieka.

² Mwene Zambi kakutungulula Yerusaleme; kakuhilwisa mu chifuchi cho waze te atwama mu undungo.

³ Kakulembejeka akwa yinyengo mu mbunge, kakuwuka yilonda yo.

⁴ Kakwalula matongonoshi, kakwavuluka eswe ha majina jo.

⁵ Mwene Zambi yetu kali munene kanda Chitunda, mana jenyi keeshi songo.

⁶ Kakunangamisa akwa kulikehesa, alioze yingulungulu kakwanyasa hashi.

⁷ Mwimbilenu Mwene Zambi miaso ya kuchichimieka, mwimbilenu Zambi yetu miaso ni kalialia.

⁸ Kakumwanga malelwa mwilu, kakunokesa vula hashi, kakusokesa yambu ha milundu.

⁹ Kakwaha tushitu yakulia, kakulisa ana a tujila muze akwivwa zala.

¹⁰ Keshi kuwahilila ni tuvwalu a tachi hanji tujita a hamu;

¹¹ Alioze kakuwahilila ni atu waze akumulemesa, atu waze akushachila ha zango lienyi lize kulishi kuhwa.

¹² Yenu akwa Yerusaleme, chichimiekenu Mwene Zambi! Yenu akwa Zione, halisenu Mwene Zambi!

¹³ Kakufunga yajilo ya limbo lienu kanawa, kakuwahisa atu jenu.

¹⁴ Kakufunga njiza ja chifuchi chetu kanawa, kakunwaha tiriku yibema yahiana.

¹⁵ Kakulongesa hashi, ni yize akwamba yakulingiwa nikawashi.

¹⁶ Kakutuma neve (neige) ngwe chingamba chitoma, kakumwanga mbundu ya chishika ngwe fufuta.

¹⁷ Kakunokesa vula ya chiwe ngwe maholo; atu keeshi kuhasa kulihumikiza ni chishika chize.

¹⁸ Nyi mahanjika ku chiwe, muchalumuka meya; nyi mahanjika ku fuji, meya maapukumuka nawa.

¹⁹ Kakulweza manyonga jenyi kuli Yakoba, kakuhana longeso lienyi ni Shimbi jenyi kuli Israele.

²⁰ Yuma yino kayilingile ko ku mavungu akwo; kaanyingikine ko Shimbi jenyi. Chichimiekenu Mwene Zambi!