Miaso (Masamu) 146 - Mukanda Wa Zambi 1970

Chichimiekenu Zambi chilamwina chetu

¹ Chichimiekenu Mwene Zambi! Nguchichimieke Zambi ni mbunge yami yeswe!

² Mungumuchichimieka matangwa eswe a mwono wami, mungwimbila Mwene Zambi ku miaka yeswe.

³ Kanda nushachila hali atu alemu; mukwa hashi niumwe mahasa kunulamwina.

⁴ Muze maafwa, maahiluka ku mavu; ha tangwa lizeliene manyonga jo maasula.

⁵ Kawaha yoze uli ni Zambi ya Yakoba kumukwasa, yoze wakusa mbunge kuli Mwene Zambi, Zambi yenyi,

⁶ yoze watangile lilu, ni hashi, ni kalunga lwiji, ni yuma yeswe yize yilimo. Matangwa eswe kakufunga yilakenyo yenyi;

⁷ kakubatwila akwa lamba ni ululi, kakulisa akwa kuhona. Mwene Zambi kakutusula funge mu zuwo lia lamba,

⁸ kakulawisa meso ja tupuputa. Kakuhindwisa waze haalimbuka; kakuzanga akwa ululi.

⁹ Kakufunga njize; kakukwasa ana a shiwa ni mapwo waze hanafwisa malunga, alioze kakubinjisa manyonga ja yingulungulu.

¹⁰ Mwene Zambi makayula ndoo ku miaka yeswe! Yenu akwa Zione, Zambi yenu makayula ku yisemuko yeswe. Chichimiekenu Mwene Zambi!