Miaso (Masamu) 144 - Mukanda Wa Zambi 1970

Mwaso wa David muze akumbile mu jita

¹ Chichimiekenu Mwene Zambi, liwe liami, kakungululikila ni kungulongesa kwasa jita.

² Iye wakungufunga ni kunguhakwila, kali chiswamo chami kanda chilamwina chami; nakushachila hali iye hanga angufunge. Kakunguzeyesela mavungu akwo.

³ Mwene Zambi, mwe mutu kali iya mba hanga umunyongene, kali iya mba umutale?

⁴ Kali kwenyi lume ngwe fuji; mwono wenyi uli lume ngwe chizulie chize chinabalika.

⁵ Aa Mwene Zambi, bula lilu, Palumuka; kwata milundu hanga yituhwise mwishi.

⁶ Tuma mihenyo, hanga yihange akwa kole je, ase mivwi ye hanga achine!

⁷ Muze mwilu uli, Olola kwoko lie, ungutuhwise ku meya asuku; ngulamwine kama ku moko ja yilambala,

⁸ waze akuhanjika mahuza chibwe muze akulishinga.

⁹ Aa Zambi, mungukwimbila mwaso Waha, mungukuchichimieka ni kalialia.

¹⁰ Wakukwasa mianangana kukumba, wakulamwina kavumbi ke David.

¹¹ Ngulamwine kama ku uswii wa akwa kole jami, ngulamwine kama ku moko ja yilambala, waze akuhanjika mahuza chibwe muze akulishinga.

¹² Akweze jetu a malunga abwe ngwe mitondo yikolo yize yinatatuka. Akweze jetu a mapwo abwe ngwe manguji akolo, mu mambango waze akuhenyesa zuwo lia mwanangana.

¹³ Machila jetu azale ni mbuto yeka ni yeka ya mu minda. Mapanga jetu aseme ana tununu ni tununu.

¹⁴ Ngombe jetu nawa aseme ana anji, kanda aselumuna kama, kanda afwafwa. Mu mikala yetu kanda mutuhwoka mbimbi ja kulila!

¹⁵ Kawaha atu waze akumona yiwape yino, kawaha atu waze akwete Zambi yo, Mwene Zambi!