Miaso (Masamu) 141 - Mukanda Wa Zambi 1970

Kulemba cha chingoloshi

¹ Mwene Zambi, ngunakutambika, nalemba ngukwase kama haliabwila! ngubanjike kama muze ngunakutambika.

² Tayiza kama kulemba chami ngwe mulambu wa yuma ya vumba libema, kuzunduka cha moko jami ngwe mulambu wa chingoloshi.

³ Mwene Zambi, funga kama kanwa liami, ulifunge ngwe kafunga!

⁴ Ngufunge kama hanga chichi kulinga yibi, hanji kulichinga ni atu abi mu ungulungulu wo. Ngulitune kulia hamwe no mu yiwanyino yo!

⁵ Mukwa ululi mahasa kungumwesa lamba ni kungubajila ni zango, alioze chichi kutayiza yingulungulu kungubebieka, mumu matangwa eswe nakulemba ngwami, kutaka cho chibi chikahwe.

⁶ Muze akwa kuyula jo maakaalimbwisa ku milundu, mba atu maakatayiza ngwo, yize te nakwamba yili yamwenemwene.

⁷ Yifwaha ya yingulungulu mu mafuka muyikafwenyoka, ngwe chize kunyi jakubatwoka yipinji yipinji.

⁸ Alioze Mwene Zambi, Zambi yami, nakushachila hali yena, ngufunge kama, kanda ungwecha ngufwe!

⁹ Ngufunge kama ku miheto, yize yingulungulu haangutela.

¹⁰ Yingulungulu afwe mu miheto yo ene, alioze yami nguwahe kwami.