Miaso (Masamu) 140 - Mukanda Wa Zambi 1970

Kalemba: “Mwene Zambi ngufunge kama”

¹ Mwene Zambi ngulamwine kama kuli yingulungulu.

² Matangwa eswe kaakungutwama punga ya kungulinga yibi, matangwa eswe kaakufupa kulimika ni yami.

³ Malimi jo kaali ngwe yihili, maliji jo ngwe ulembe wa tupela.

⁴ Mwene Zambi ngufunge kama mumu hali yingulungulu; ngufunge kama mumu hali yingalwe waze akufupa kungulimbwisa.

⁵ Akwa kulengumuka haanangutela miheto, haangutela Wanda mu jila hanga ngufwe mo.

⁶ Ngunambe kuli Mwene Zambi ngwami: “Yena uli Zambi yami.” Mwene Zambi, banjika kama kulila chami, ungukwase!

⁷ Mwene Zambi, Zambi yami, yena uli Chilamwina chami wa ndundo! Hiunangufungu mu jita.

⁸ Mwene Zambi kanda Waha yingulungulu yuma yize anazange, kanda watayiza kunguhiana.

⁹ Akwa kole jami kanda akumba, yibi yo yaahilukile ayo ene.

¹⁰ Makala a kahia aaholokele kama, ni e akwa kole ambile mu wina usuku, kanda atuhuka mo nawa.

¹¹ Atu waze akulamikiza akwo milonga, kanda akumba ni kujikiza, yibi yiholokele hali yingalwe hanga afwe kwo.

¹² Mwene Zambi, ngunanyingika ngwami, wakuhatwila yiswale, wakukwasa akwa kuhona.

¹³ Chamwenemwene, akwa ululi maakakuchichimieka, maakaliendela ni yena.