Miaso (Masamu) 139 - Mukanda Wa Zambi 1970

Chize Zambi anyingika atu ni kwafunga

¹ Mwene Zambi, hiunangweseka, unangunyingika.

² Unanyingika yeswe yize nakulinga; chibwe uli kusuku Unanyingika manyonga jami eswe.

³ Wakungumona muze ngunende ni muze ngunatwama, unanyingika yitanga yami yeswe.

⁴ Chibwe shimbu kanda nguchihanjika, yena Unanyingika yize ngunambe kwamba.

⁵ Yena wakungujingilika kweswe, wakungufunga ni ndundo je,

⁶ Mana je hakutwala kuli yami kaananguhiana, chahashile kwanyingika.

⁷ Kulihi munguhasa kuchina Mwiku we? Kulihi mungukuchinyina?

⁸ Chibwe nguzezuke mwilu yena mwe uli, chibwe nguse muhela wami muma mwa afu, yena mwe uli.

⁹ Chibwe nguhumuke ngwe kajila ni kuya ndoo ku sali lia chivumbuko, hanji ngutwame musali lia kalunga lwiji ku chitokelo,

¹⁰ yena kwenako wakungutwala ni kungukwasa ni kwoko lie lia chindume.

¹¹ Ngunahase kwamba ngwami, milima yingusweke ni pangu lialumuke kama milima.

¹² Alioze chibwe milima kuli yena hi milima ko, ufuku uli lume ngwe mwalwa. Kuli yena milima ni pangu yili kwayo chimuwika.

¹³ Yena watangile mujimba wami weswe, yena wangululikile mu jimo lia mama.

¹⁴ Nakukuchichimieka mumu chize wangutangile chili kole ni woma; yuma yeswe wakulinga yili yakulishimwoka, ngunachinyingika kanawa.

¹⁵ Muze yifwaha yami yalisokekele mu jimo lia mama, muze natatukile ku tenga, yena te Unanyingika ngwe, yami kwe nguli.

¹⁶ Yena wangumwene muze te kanda nguchisemuka. Matangwa waze wanguselele akutwama ni mwono, chibwe te kanda achibutuka, hindu te kaali mu mukanda we.

¹⁷ Zambi manyonga je akalu kunyingika, ni ene kaali anji kuhiana!

¹⁸ Nyi ngwami ngwalule, kaanahiana masekeseke. Chibwe nguhinduke ha tulo, hindu nguli ni yena.

¹⁹ Aa Zambi, ushiha kama yingulungulu! Yingalwe angwehuke kama!

²⁰ Kaakukushililika; kaakukwamba yuma yibi.

²¹ Aa Mwene Zambi, nakuvutwokela waze akukuvutwokela! Nakubihilila waze akulimika ni yena.

²² Hinaavutwokela kuhiana, nakwaalula ngwe akwa kole jami.

²³ Aa Zambi, nguhengule kama unyingike mbunge yami, ngweseke kama, unyingike manyonga jami.

²⁴ Umone nyi ku muli chimwe chibi, ngusongwele mu jila yibema ya miaka yeswe.