Miaso (Masamu) 138 - Mukanda Wa Zambi 1970

Sakwililenu Zambi

¹ Mwene Zambi, ngunakusakwilila ni mbunge yami yeswe, ngunakwimbila miaso ya kukuhalisa ku meso ja mazambi.

² Ngunatalikisa ku zuwo lie lia chijila, ngunafukama ni kuchichimieka jina lie, mumu ha zango lie lize kulishi kuhwa mumu ha umwenemwene we, mumu hiunalwezana ngwe, jina lie ni Shimbi je jinahiana ulemu.

³ Muze nakutambikile, wangukumbulwile; yiungutakamisa ni ndundo je.

⁴ Mwene Zambi, mianangana eswe a hashi maakakuchichimieka, mumu heevwa yilakenyo ye.

⁵ Maakemba miaso mumu ha yuma yinene yize walingile, ni mumu ha uhenya we Wahiana.

⁶ Mwene Zambi chibwe uli kusuku mwilu, hindu wakutala akwa kulikehesa, akwa kulengumuka kaahashile kuswama ku meso je.

⁷ Chibwe lamba liangwoka naye, hindu yena wakungufunga, wakulimika ni akwa kole jami mu ufwatulo wo, wakungulamwina ni ndundo je.

⁸ Yena muukamanununa yilakenyo ye yeswe; Mwene Zambi, zango lie kulishi kuhwa nichimwe, kanda wehuka yitanga ya moko je.