Miaso (Masamu) 136 - Mukanda Wa Zambi 1970

Sakwililenu Mwene Zambi

¹ Sakwililenu Mwene Zambi mumu kali mubema; zango lienyi kulishi kuhwa nichimwe.

² Sakwililenu Mwene Zambi wa mazambi, zango lienyi kulishi kuhwa nichimwe.

³ Sakwililenu Mwene wa ene, zango lienyi kulishi kuhwa nichimwe.

⁴ Iye wika wakulinga yikomokeso; zango lienyi kulishi kuhwa nichimwe.

⁵ Yatanga lilu ni mana jenyi; zango lienyi kulishi kuhwa nichimwe.

⁶ Yatanga hashi helu lia meya ajotoka; zango lienyi kulishi kuhwa nichimwe.

⁷ Yatanga tangwa ni kakweji; zango lienyi kulishi kuhwa nichimwe;

⁸ tangwa lia kuyula ha mwalwa; zango lienyi kulishi kuhwa nichimwe;

⁹ kakweji ni matongonoshi ya kuyula ha ufuku; zango lienyi kulishi kuhwa nichimwe.

¹⁰ Yashiha ana atangu a malunga ja akwa Egiptu, zango lienyi kulishi kuhwa nichimwe.

¹¹ Yatuhwisa Aisraele mu chifuchi cha Egiptu; zango lienyi kulishi kuhwa nichimwe.

¹² Yaatuhwisa ni kwoko lia kwolola lia ndundo; zango lienyi kulishi kuhwa nichimwe.

¹³ Yahandununa kalunga lwiji Muchila, zango lienyi kulishi kuhwa nichimwe.

¹⁴ Yazawisa atu jenyi; zango lienyi kulishi kuhwa nichimwe.

¹⁵ Alioze yashihila mo mwanangana wa Egiptu ni tujita twenyi, zango lienyi kulishi kuhwa nichimwe.

¹⁶ Yasongwela atu jenyi mu puya, zango lienyi kulishi kuhwa nichimwe.

¹⁷ Yashiha mianangana a tachi; zango lienyi kulishi kuhwa nichimwe.

¹⁸ Yashiha mianangana a lufuma; zango lienyi kulishi kuhwa nichimwe.

¹⁹ Sihone mwanangana wa Aamore; zango lienyi kulishi kuhwa nichimwe;

²⁰ ni Oge mwanangana wa chifuchi cha Bashane; zango lienyi kulishi kuhwa nichimwe.

²¹ Yaha atu jenyi yifuchi yo; zango lienyi kulishi kuhwa nichimwe.

²² Yaha Aisraele, kavumbi kenyi yifuchi yo; zango lienyi kulishi kuhwa nichimwe.

²³ Yatwiwuluka muze akwa kole haatukumba; zango lienyi kulishi kuhwa nichimwe.

²⁴ Yatutusula kuli akwa kole jetu; zango lienyi kulishi kuhwa nichimwe.

²⁵ Kakulisa atu eswe ni tushitu eswe, zango lienyi kulishi kuhwa nichimwe.

²⁶ Sakwililenu Mwene Zambi wa mwilu, zango lienyi kulishi kuhwa nichimwe.