Miaso (Masamu) 135 - Mukanda Wa Zambi 1970

Chichimiekenu Mwene Zambi

¹ Chichimiekenu Mwene Zambi! Chichimiekenu jina lienyi, yenu tuvumbi twenyi,

² yenu waze nwakumana mu zuwo lienyi, mu zuwo lia Zambi yetu.

³ Chichimiekenu Mwene Zambi, mumu kali mubema, mwimbilenu miaso mumu chinalite.

⁴ Hanatongola Yakoba akabwe niwenyi, hanatongola Aisraele akabwe atu jenyi.

⁵ Ngunanyingika ngwami, Mwene Zambi yetu kali munene, kanahiana mazambi eswe.

⁶ Kakulinga yeswe yize akuzanga, mwilu ni hano hashi, ni mu meya ni kushi lia hashi.

⁷ Kakututumina malelwa a vula ku mbango jeswe ja hashi; kakutanga mihenyo ya vula, kakutuhwisa fuji kuma liayo.

⁸ Mu chifuchi cha Egiptu yashiha ana atangu a atu ni tushitu.

⁹ Kwenako alingilile yipupu ni yikomokeso, hanga amwese mwanangana wa Egiptu ni atu jenyi lamba.

¹⁰ Yoonona mavungu anji, yashiha mianangana a lufuma:

¹¹ Sihone mwanangana wa Aamore, ni Oge mwanangana wa mu chifuchi cha Bashane, ni mianangana eswe a mu chifuchi cha Kanana.

¹² Yahana yifuchi yo kuli atu jenyi; yayihana kuli Aisraele.

¹³ Mwene Zambi, jina lie mulifumana ndoo ku miaka yeswe, yisemuko yeswe maakakwiwuluka.

¹⁴ Mwene Zambi makasambisa atu jenyi, maakeevwila keke.

¹⁵ Mazambi ja mavungu kaali a prata ni oru, akulinga ni moko ja atu.

¹⁶ Makanwa akwete, alioze keeshi kuhanjika, meso akwete, alioze keeshi kumona.

¹⁷ Matwi akwete, alioze keeshi kwivwa, kaahashile chibwe kuhwima.

¹⁸ Eswe waze aalingile ni waze aakwasa mbunge, abwe kama ngwe ayo.

¹⁹ Yenu Aisraele, chichimiekenu Zambi, yenu mahako a Zambi, muchichimiekenu!

²⁰ Yenu Alevi, chichimiekenu Mwene Zambi; yenu eswe nwakumulemesa, muchichimiekenu!

²¹ Chichimiekenu Mwene Zambi mu Zione, mu mahienyi mu Yerusaleme. Chichimiekenu Mwene Zambi!