Miaso (Masamu) 132 - Mukanda Wa Zambi 1970

Uhenya wa zuwo lia Zambi

¹ Mwene Zambi, iwuluka David ni lamba heswe lize amwene.

² Iwuluka kama, chize alishingile ku meso je, chize alakenyene kuli yena, Zambi Chitunda, Zambi ya Yakoba ngwenyi:

³ “Chichi kunjila mu zuwo, hanji kubomba,

⁴ chichi kuhwima hanji kuya tulo,

⁵ ndoo ni muze hinafupila Mwene Zambi muhela, zuwo lia Zambi Chitunda, Zambi ya Yakoba.”

⁶ Ku limbo lia Betleheme hitunevu sango ja mushete wa Usendo, mba yituumona mu minda ku limbo lia Jearime.

⁷ Yitwamba ngwetu: “Tuyenu mu zuwo lia Mwene Zambi, tuyenu ni kuwayila kulutwe lia chitwamo chenyi cha wanangana!”

⁸ Mwene Zambi njila mu zuwo lie hamwe ni mushete wa Usendo, che chinyingi cha ndundo je, utwamemo ndoo ku miaka yeswe,

⁹ Mahako je abwe akwa ululi matangwa eswe; atu je atwe milolo ya uwahililo.

¹⁰ Mwene Zambi, hiunalakenya kavumbi ke David; kanda wehuka mwanangana we yoze watongwele.

¹¹ Hiunalishingi ku meso ja David; Shingo lize kuuchi kalishingulula lio. Hiunambe ngwe: “Mungupwisa umwe wa kuli ana je a malunga mwanangana, mwe makakuhinga.

¹² Nyi ana je maakafunga Usendo weta kanawa, ni Shimbi jize mungukaaha, ni ana jo nawa kumaakabwa mianangana ndoo ku miaka yeswe.”

¹³ Mwene Zambi hanatongola Zione, kakuzanga libwe limbo lienyi.

¹⁴ Kanambe ngwenyi: “Mungukabwa ko ndoo ku miaka yeswe; kwenako mungukayula lume.

¹⁵ Akwa Zione mungukaaha yuma yeswe yize akuhona, yiswale a mu Zione mungwalisa.

¹⁶ Munguwahisa mahako a mu Zione mu yeswe yize akulinga; akwa Zione meemba ni kutwa milolo ya uwahililo.

¹⁷ Mwenamo mungukapwisa umwe wa ku vungu lia David mwanangana munene, mwenamo mungukafunga wanangana wa mutu yoze natongwele.

¹⁸ Mungukakolesa akwa kole jenyi sonyi, alioze wanangana wenyi muukalinduluka ni uhenya.”