Miaso (Masamu) 128 - Mukanda Wa Zambi 1970

Mwene Zambi mawahisa atu waze maamwononokena

¹ Kawaha atu waze akulemesa Zambi, waze akufunga Shimbi jenyi.

² Yena muulia kanawa mumu ha kuhondangana che, muuwahilila, muubwa ni yuma yinji.

³ Pwo lie mabwa ngwe mutondo wa vinyu, uze wakwima mihuko yinji, ana je maabwa nikujingilika mesa ngwe mitondo ya olive.

⁴ Chamwenemwene mutu yoze wakulemesa Mwene Zambi, mamona yiwape yino.

⁵ Mwene Zambi, kuze ku Zione, akuwahise kama! Umone kama yiwape ya Yerusaleme matangwa eswe a mwono we!

⁶ Ukamone kama ajikulu je! Mwene Zambi ahwimise kama Aisraele!