Miaso (Masamu) 127 - Mukanda Wa Zambi 1970

Chichimiekenu Mwene Zambi

¹ Nyi Mwene Zambi katungile zuwo, milimo ya tungi yili kwayo yamokomoko. Nyi Mwene Zambi kafungile limbo, tufunga kaakutwama chamokomoko.

² Chamokomoko twakuhondangana mba tubwe ni yakulia yinji, kulimeneka chichamene kubomba ha muchima ufuku; mumu Mwene Zambi, atu jenyi waze azanga, kakwakwasa muze akubomba.

³ Ana kaali chawana cha kuli Zambi, kaali yiwape yize akwaha atu jenyi.

⁴ Ana malunga waze lunga akusema mu ukweze wenyi kaali ngwe mivwi mu kwoko lia kajita.

⁵ Kawaha yoze uli ni mivwi yinji! Kechi kumona sonyi muze makahanjika ni akwa kole jenyi mu chisopelo.