Miaso (Masamu) 119 - Mukanda Wa Zambi 1970

Shimbi ja Mwene Zambi

¹ Kawaha atu waze ali ni mbunge jibema, waze akufunga Shimbi ja Mwene Zambi.

² Kawaha waze akwononokena Shimbi jenyi, waze akumwononokena ni mbunge jo jeswe.

³ Keeshi kulinga uhenge; kaakwenda mu majila ja Mwene Zambi.

⁴ Hiunatwehe Shimbi je, hiunatwambe tujikaule kanawa.

⁵ Ngunase ko mbunge ngwami, munguhasa kufunga yiyulo ye.

⁶ Nyi nakulemesa Shimbi je kanawa, kachi chichi kwivwa sonyi.

⁷ Muze nakulilongesa chize wakubatwila atu ni ululi, nakukuchichimieka ni mbunge yibema.

⁸ Mungufunga yiyulo ye; kanda ungwehuka nichimwe.

Nakufunga Shimbi ja Mwene Zambi

⁹ Ngwe kuchi mwana lunga mabwa ni ndako jibema mu mwono wenyi? Nyi mafunga Shimbi je.

¹⁰ Nakweseka kukulingila ni mbunge yami yeswe; ngufunge kama kanda ngukolema Shimbi je.

¹¹ Nakusweka maliji je mu mbunge yami, kuchina mungukuvulumuma.

¹² Mwene Zambi ngunakuchichimieka; ngulweze kama majila je.

¹³ Mungwalakana Shimbi je jeswe jize wanguhele.

¹⁴ Nakuwahilila ni kukaula Shimbi je, hi ubite ko.

¹⁵ Nakubukuna Shimbi je, nakushishika longeso lie kanawa.

¹⁶ Nakuwahilila ni yiyulo ye, chichi kuyivulama.

Nakuwahilila ni Shimbi ja Mwene Zambi

¹⁷ Ngulinge kama yibema, yami kavumbi ke, mba hanga ngutwame ni mwono, ngufunge longeso lie.

¹⁸ Ngulawise kama meso jami, hanga ngumone yuma ya kukomwesa ya mu Shimbi je.

¹⁹ Nguli ngeji hano hashi, kanda unguswekela kama Shimbi je!

²⁰ Mbunge yami yinalibikala, mumu ngunazange kunyingika chize wakubatwila atu.

²¹ Wakukanjisa akwa kulengumuka, shinga kama waze akukolema Shimbi je.

²² Nguchize kama luchoko ni sau ya atu, mumu nakufunga Shimbi je.

²³ Mianangana kaakulikungulula ni kungutwama punga, alioze yami mungulilongesa longeso lie.

²⁴ Shimbi je jakunguwahisa, jakunguyula.

Nabatula ngwami: “Mungufunga Shimbi ja Mwene Zambi”

²⁵ Hinalimbuka mu fufuta ya hashi; nguhuzulule kama ngwe chize walakenyene.

²⁶ Hinatayiza milonga yami, ni yena hiwangukumbulula; ngulweze kama majila je.

²⁷ Ngukwase kunyingika Shimbi je, mba ngubukune yitanga ye ya kukomwesa.

²⁸ Ngunanenganyana kuhiana; ngutakamise kama ngwe chize walakenyene.

²⁹ Ngufunge kama, kanda ngubwa mukwa mahuza; mu utu we, ngulongese Shimbi je.

³⁰ Hingunatongola kukwononokena, nakufunga Shimbi je kanawa.

³¹ Mwene Zambi, hingunakaula longeso lie, kanda ungukolesa sonyi.

³² Mungufunga kanawa Shimbi je, mumu yena muunguweza mana.

Kulemba: “Mwene Zambi ngwehe kama mana”

³³ Mwene Zambi ngulongese ulumbunwiso wa Shimbi je, mba mungujikaula matangwa eswe.

³⁴ Ngulumbunwine Shimbi je, mba ngujononokene; mungujifunga ni mbunge yami yeswe.

³⁵ Ngukwase kwononokena Shimbi je, mumu nakuwahilila najo.

³⁶ Nguvwise usona ngufunge Shimbi je, hi kubwa pichi ko.

³⁷ Nguchize kama meso ku yuma yamokomoko, ungulweze utu we ngwe chize walakenyene.

³⁸ Manununa kama chilakenyo che kuli yami, kavumbi ke, chilakenyo chize wakuhana kuli waze akukulemesa.

³⁹ Ngufunge kama kuli waze akungushililika, mumu nakweevwila woma, yena wakubatwila atu kanawa.

⁴⁰ Ngunevu usona wa Shimbi je; ngupwise ni mwono Waha, mumu yena uli mukwa ululi.

Nakushachila ha Shimbi ja Mwene Zambi

⁴¹ Mwene Zambi, ngulweze chize wakunguzanga, ngulamwine ngwe chize walakenyene.

⁴² Mba nguhase kukumbulula waze akungushililika, nakushachila ha maliji je.

⁴³ Ngutakamise hanga nguhase kuhanjika yuma yamwenemwene matangwa eswe, mumu nakusa ko mbunge ngwami, wakubatwila atu ni ululi.

⁴⁴ Matangwa eswe mungufunga Shimbi je, chichi kajehuka ndoo ku miaka yeswe.

⁴⁵ Mungubwa lume mukwa kutusuka, mumu nguneseka kukaula Shimbi je.

⁴⁶ Mungwambujola Shimbi je kuli mianangana, chichi kwivwa sonyi nichimwe.

⁴⁷ Nakuwahilila ni kwononokena Shimbi je, mumu nakujizanga.

⁴⁸ Nakulemesa Shimbi je, nakujizanga; mungubukuna longeso lie.

Nakushachila ha Shimbi ja Mwene Zambi

⁴⁹ Iwuluka kama chilakenyo che kuli yami kavumbi ke, mumu nakusa ko mbunge.

⁵⁰ Chibwe mu lamba liami nakujikiza, mumu chilakenyo che chakunguhuzulula.

⁵¹ Akwa kulengumuka kaakungusaula, alioze Chishi kwehuka Shimbi je.

⁵² Aa Mwene Zambi, nakwiwuluka chize te wakubatwila atu ku shakulu, kuchakungutakamisa.

⁵³ Nakwivwa wuli unji, muze nakumona ngwe chize yingulungulu akukolema Shimbi je.

⁵⁴ Mu ungeji wami hano hashi, nakutomba miaso hakutwala ku Shimbi je.

⁵⁵ Mwene Zambi, ha ufuku nakukwiwuluka, nakubukuna Shimbi je.

⁵⁶ Chize nakulinga chili ha kufunga Shimbi je.

Nakulihana ku Shimbi ja Mwene Zambi

⁵⁷ Aa Mwene Zambi, nakuzanga yena wika; ngunalakenya kufunga Shimbi je.

⁵⁸ Ngunahula ni mbunge yami yeswe ngwami, nguvwile kama keke ngwe chize walakenyene!

⁵⁹ Hinanyonga ha ndako jami, ngunalakenya kukaula yiyulo ye.

⁶⁰ Mungulipupwisa kufunga Shimbi je, chichi kulaluka.

⁶¹ Yingulungulu haanguseleka ni miheto yo, alioze Chishi kuvulama Shimbi je.

⁶² Ha muchima ufuku nakuhinduka, ni kukuchichimieka mumu yena wakubatula ni ululi.

⁶³ Nguli sepa lia atu eswe waze akukulemesa, waze akufunga Shimbi je.

⁶⁴ Mwene Zambi, hashi hihazala ni zango lie lize kulishi kuhwa, ngulongese kama Shimbi je!

Shimbi ja Mwene Zambi jili jilemu

⁶⁵ Mwene Zambi, hiunalingi kanawa kuli yami kavumbi ke, nikulita ni chilakenyo che.

⁶⁶ Ngwehe kama mana ni malinjekela, mumu nakushachila ha Shimbi je.

⁶⁷ Hatangu te nakupiasuka, kashika te wakungumwesa lamba. Alioze haliabwila nakwononokena Shimbi je.

⁶⁸ Yena uli mubema, uli mukwa utu; ngulongese kama Shimbi je!

⁶⁹ Akwa kulengumuka kaakunguliongela yuma ya mahuza, alioze nakufunga yiyulo ye ni mbunge yami yeswe.

⁷⁰ Atu waze keeshi mana, alioze yami nakuwahilila mu Shimbi je.

⁷¹ Lamba lize wangumwesene te linalite, mumu hingunalilongesa kanawa yiyulo ye.

⁷² Shimbi jize wanguhele ngunajizange, kuhiana ubite weswe wa hashi.

Shimbi ja Mwene Zambi jili ja ululi

⁷³ Yena wangutangile, wakungufunga kanawa, ngwehe mana, mba hanga nguhase kulilongesa Shimbi je.

⁷⁴ Atu waze akukulemesa maawahilila ha kungumona, mumu nakusa mbunge ku chilakenyo che.

⁷⁵ Mwene Zambi, ngunanyingika ngwami, wakubatula ni ululi; ni ululi wangumwesene lamba.

⁷⁶ Ngutakamise kama ni zango lie lize kulishi kuhwa, ngwe chize wangulakenyene yami kavumbi ke.

⁷⁷ Nguvwile kama keke, mba hanga ngutwame ni mwono, mumu nakuwahilila ni Shimbi je.

⁷⁸ Akwa kulengumuka evwe kama sonyi; alioze yami, mungubukuna longeso lie.

⁷⁹ Atu waze akukulemesa eze kuli yami, waze anyingika Shimbi je.

⁸⁰ Chinalite ngufunge yiyulo ye kanawa, hanga chichi kevwa sonyi.

Kulemba: “Mwene Zambi ngulamwine kama”

⁸¹ Mwene Zambi, hijanguhwa ni kukushimbwila ungulamwine kama; nakusa mbunge ku maliji je.

⁸² Meso jami haachila ni kushimbwila kumanunuka cha chilakenyo che; nakulihula ngwami: “Tangwa lika muungukwasa kama?”

⁸³ Nguli ngwe tuku ya makubu yize haambila; hindu Chishi kuvulama Shimbi je.

⁸⁴ Matangwa angahi Changutamba kushimbwila? Tangwa lika muumwesa lamba waze akunguhungumiona?

⁸⁵ Akwa kulengumuka waze keeshi kwononokena Shimbi je, haangufulila mena hanga angukwate.

⁸⁶ Shimbi je jeswe jili jamwenemwene, atu kaakunguhungumiona ni mahuza; ngukwase kama!

⁸⁷ Te hasala hakepe angushihe, alioze yami chehukile ko Shimbi je.

⁸⁸ Nguhuzulule nikulita ni zango lie lize kulishi kuhwa, mba mungwononokena Shimbi je.

Nakushachila ha Shimbi ja Mwene Zambi

⁸⁹ Aa Mwene Zambi, maliji je kaanakolo mwilu; keechi kahwa ndoo ku miaka yeswe.

⁹⁰ Umwenemwene we wakubwa ku yisemuko yeswe, hiunakolesa hashi, kuhakola mbee.

⁹¹ Yeswe yili chizechene ndoo ni musono uno mumu ha Shimbi je, yena wakuyiyula yeswe.

⁹² Nyi te Shimbi je kujishi kunguwahisa, kachi te hingunafu ni lamba liami.

⁹³ Chichi kuvulama Shimbi je nichimwe, mumu we mwono wami.

⁹⁴ Nguli niwe, ngulamwine kama! nakulihana ku Shimbi je.

⁹⁵ Yingulungulu kaakungujikinyina angushihe, alioze yami mungubukuna Shimbi je.

⁹⁶ Ngunanyingika ngwami, yuma yeswe yize twakumona masongo yikwete, alioze Shimbi je kujishi kuhwa.

Nakuzanga Shimbi ja Mwene Zambi

⁹⁷ Nakuzanga Shimbi je kuhiana! Nakujibukuna tangwa heswe.

⁹⁸ Nguli ni Shimbi je matangwa eswe, jakungwaha mana kuhiana akwa kole jami.

⁹⁹ Nguli ni mana kuhiana alongeshi jami, mumu nakubukuna longeso lie.

¹⁰⁰ Nguli ni mana kuhiana makulwana jami, mumu nakwononokena Shimbi je.

¹⁰¹ Hingunehuka jila yeswe yibi, hanga ngwononokene maliji je.

¹⁰² Chehukile longeso lie, mumu yena mwene wangulongesele.

¹⁰³ Shimbi je kujayekemena, kujayema kuhiana wuchi.

¹⁰⁴ Nakutambula mana ku Shimbi je, kashika nakuvutwokela ndako yeswe yibi.

Shimbi ja Mwene Zambi jakupangulwisa atu

¹⁰⁵ Maliji je kaali ndeya ku yiliato yami, kanda lutemo ku jila yami.

¹⁰⁶ Hingunalakenya kwononokena longeso lie liamwenemwene.

¹⁰⁷ Mwene Zambi, nakumona lamba liahiana, funga kama mwono wami ngwe chize walakenyene.

¹⁰⁸ Aa Mwene Zambi, tayiza kama kusakwilila chami, ngulongese Shimbi je.

¹⁰⁹ Yisuho yinji nakubwa hehi ni kufwa; alioze Chishi kukolema Shimbi je.

¹¹⁰ Yingulungulu kaakungutela miheto, alioze chehukile ko Shimbi je.

¹¹¹ Longeso lie lili nihami ndoo ku miaka yeswe, kuliakunguwahilisa.

¹¹² Hingunabatula kufunga Shimbi je, ndoo ni ku kufwa chami.

Shimbi ja Mwene Zambi kujakungufunga

¹¹³ Nakuvutwokela akwa mbunge jaali, alioze nakuzanga Shimbi je.

¹¹⁴ Yena uli chiswamo chami kanda lukebwe wami; nakusa mbunge yami ku chilakenyo che.

¹¹⁵ Yenu yivulumunyi, ngukatukenu, hanga ngwononokene Shimbi ja Zambi yami.

¹¹⁶ Ngutakamise ngwe chize walakenyene, hanga chichi kufwa; kanda ungukolesa sonyi mumu nakukusa mbunge.

¹¹⁷ Ngukwate hanga ngubwe mu uhwimino, mba ngufunge Shimbi je matangwa eswe.

¹¹⁸ Wakulituna eswe waze akukolema Shimbi je, kwonga cho chili chamokomoko.

¹¹⁹ Yingulungulu eswe wakwamona ngwe Chuma cha majilo, kashika yami nakuzanga longeso lie.

¹²⁰ Ngunachikima ku meso je; nakwivwa woma ha chize wakubatwila atu.

Nakufunga Shimbi ja Mwene Zambi

¹²¹ Nakulinga yuma ya ululi ni ya umwenemwene, kanda unguhichika mu moko ja akwa kole jami!

¹²² Ngulakenye ngwe, muungukwasa yami kavumbi ke; kanda utayiza akwa kulengumuka kunguhungumiona.

¹²³ Meso jami haachila ni kushimbwila kutusuka chize walakenyene.

¹²⁴ Ngulinge nikulita ni zango lie lize kulishi kuhwa, ngulongese Shimbi je.

¹²⁵ Nguli kavumbi ke, ngwehe mana, mba hanga ngunyingike longeso lie.

¹²⁶ Mwene Zambi tangwa hiliaheta lia kulinga milimo ye, mumu atu kaakukolema Shimbi je!

¹²⁷ Nakuzanga Shimbi je kuhiana oru, kuhiana oru yibema.

¹²⁸ Kashika nakukaula longeso lie heswe, nakuvutwokela majila eswe a mahuza.

Ngunazange kwononokena Shimbi ja Mwene Zambi

¹²⁹ Longeso lie liakungushimwokesa, nakulifunga ni mbunge yami yeswe.

¹³⁰ Longeso lie liakupangulwisa, kuliakuhana mana kuli waze keeshi mana.

¹³¹ Nakwivwa usona wa Shimbi je, ngwe pwila ya meya.

¹³² Tewulukila kuli yami Unguvwile kama keke, ngwe chize wakulinga kuli waze akukuzanga.

¹³³ Takamisa kama molu jami, ngwe chize walakenyene; yibi kanda yingukumba.

¹³⁴ Ngulamwine kama kuli waze akunguhungumiona, hanga nguhase kufunga Shimbi je.

¹³⁵ Bwako hamwe ni yami, unguwahise, ungulongese Shimbi je.

¹³⁶ Masoji kaakusulumioka mu meso ngwe meya, mumu atu keeshi kufunga Shimbi je.

Shimbi ja Mwene Zambi jili ja ululi

¹³⁷ Mwene Zambi yena uli mukwa ululi, ni Shimbi je jili ja ululi.

¹³⁸ Shimbi je jeswe jize wahanyine jili jamwenemwene kanda jibema.

¹³⁹ Ngunevu kahia chaa mu mbunge, mumu akwa kole jami kaakulelesa Shimbi je.

¹⁴⁰ Yilakenyo ye yili yamwenemwene, nakuyizanga kuhiana.

¹⁴¹ Nguli mutu wamokomoko, atu kaakungusaula; alioze yami Chishi kulelesa Shimbi je.

¹⁴² Ululi we muulinduluka ndoo ku miaka yeswe, Shimbi je jili lume jamwenemwene matangwa eswe.

¹⁴³ Lamba ni mwongo hiyangukwata, alioze Shimbi je jinangusangulwisa.

¹⁴⁴ Longeso lie lili lia ululi ndoo ku miaka yeswe, ngwehe mana, mba hanga ngutwame ni mwono.

Kulemba: “Mwene Zambi, ngulamwine kama”

¹⁴⁵ Mwene Zambi, ngunakutambika ni mbunge yami yeswe, ngukumbulule kama nalemba, mba hanga ngwononokene Shimbi je!

¹⁴⁶ Ngunakutambika ungulamwine, mba ngufunge yiyulo ye!

¹⁴⁷ Nakukutambika ungukwase muze tangwa kanda lichivumbuka, nakusa mbunge yami ku chilakenyo che.

¹⁴⁸ Ufuku weswe nakunongama, nakubukuna longeso lie.

¹⁴⁹ Mwene Zambi, ngubanjike mumu ha zango lie lize kulishi kuhwa, nguvwile kama keke, ufunge mwono wami.

¹⁵⁰ Atu waze akunguhungumiona, haakundama, alioze keeshi kukaula Shimbi je.

¹⁵¹ Alioze, Mwene Zambi, yena uli hehi ni yami; shimbi je jeswe jili jamwenemwene.

¹⁵² Hasuku hingunalilongesa hakutwala ku Shimbi je, hiunajilulika kulu jilinduluke ndoo ku miaka yeswe.

Kulemba: “Mwene Zambi ngukwase kama”

¹⁵³ Tala chize ngunamono lamba, ngulamwine kama, mumu chalelesele Shimbi je.

¹⁵⁴ Nguhakwile kama, ngutusule, ngulamwine kama ngwe chize walakenyene.

¹⁵⁵ Yingulungulu keechi kalilamwina, mumu keeshi kwononokena Shimbi je,

¹⁵⁶ Alioze, Mwene Zambi keke ye kuyahiana, ngulamwine nikulita ni ubatwilo we wa ululi.

¹⁵⁷ Nguli ni akwa kole anji yiswii, alioze yami Chakolemene Shimbi je.

¹⁵⁸ Kuze nakutala akwa uhulia waze, mumu keeshi kufunga Shimbi je.

¹⁵⁹ Mwene Zambi, tala chize nakuzanga longeso lie; zango lie kulishi kuhwa, kashika ngulamwine kama.

¹⁶⁰ Maliji je eswe kaali amwenemwene; ubatwilo we weswe uli wa ululi, kuwakulinduluka ndoo ku miaka yeswe.

Nakulihana ku Shimbi ja Mwene Zambi

¹⁶¹ Yitakame kaakunguhungumiona, alioze shili yamokomoko; yami nakulemesa Shimbi je!

¹⁶² Nakuwahilila kuhiana mumu ha yilakenyo ye, ngwe mutu yoze hawana ubite unji.

¹⁶³ Nakuvutwokela mahuza eswe, alioze nakuzanga Shimbi je.

¹⁶⁴ Tangwa ha tangwa nakusakwilila yisuho shimbiali, mumu wakubatwila atu ni ululi.

¹⁶⁵ Atu waze akuzanga Shimbi je kaali mu uhwimino Wahiana, kukushi niumwe yoze maalimbwisa.

¹⁶⁶ Mwene Zambi, nakukushimbwila, ungulamwine, nakulinga yize wakungwamba.

¹⁶⁷ Nakwononokena yiyulo ye, nakuyizanga ni mbunge yami yeswe.

¹⁶⁸ Nakwononokena Shimbi je ni longeso lie; yena Wakumona yuma yeswe yize nakulinga.

Kulemba: “Mwene Zambi ngukwase kama”

¹⁶⁹ Mwene Zambi, ivwa kuteta chami, ngukwase kama! Ngwehe mana ngwe chize walakenyene.

¹⁷⁰ Banjika kulemba chami, ngulamwine kama nikulita ni chilakenyo che!

¹⁷¹ Mungukuchichimieka matangwa eswe, mumu wakungulongesa yiyulo ye.

¹⁷² Mungwimba hakutwala ku Shimbi je, mumu yize wakungwamba kuyalita.

¹⁷³ Matangwa eswe lulika kama, ungukwase, mumu nakukaula Shimbi je.

¹⁷⁴ Aa Mwene Zambi, nakwivwa usona wa ulamwino we; nakuwahilila mu Shimbi je.

¹⁷⁵ Ngufunge kama ni mwono mba hanga ngukuchichimieke; longeso lie lingukwase kama.

¹⁷⁶ Ngunachamangina ngwe panga yoze hatoka, kashika tweya kama ungufupe yami kavumbi ke, mumu chalelesele Shimbi je.