Miaso (Masamu) 118 - Mukanda Wa Zambi 1970Sakwilenu Mwene Zambi mumu hatukwasa kukumba 1 Sakwililenu Mwene Zambi mumu kali mubema, zango lienyi kulishi kuhwa nichimwe. 2 Aisraele ambe ngwo: “Zango lienyi kulishi kuhwa nichimwe.” 3 Mahako a Zambi ambe ngwo: “Zango lienyi kulishi kuhwa nichimwe.” 4 Eswe waze akumulemesa ambe ngwo: “Zango lienyi kulishi kuhwa nichimwe.” 5 Mu lamba liami yingutambika Mwene Zambi; neye yangukumbulula, yangutusula. 6 Mwene Zambi kali hamwe ni yami, chichi kwivwa woma nichimwe, atu yika maangulinga? 7 Mwene Zambi mwe wakungukwasa, mungumona chize makumba akwa kole jami. 8 Shinaho kushachila hali Mwene Zambi, hikushachila ko hali atu. 9 Shinaho kushachila hali Mwene Zambi, hi kushachila ko hali mianangana ja hashi. 10 Akwa kole anji anguselekele, alioze naashihile ni ndundo ja Mwene Zambi! 11 Yaangujingilika sali ni sali, alioze yiingwonona ni ndundo ja Mwene Zambi! 12 Yaangujingilika ngwe puka, alioze yaawema ngwe mwambu; ni chiyulo cha Mwene Zambi yingwonona! 13 Yaangushinjika ni tachi hanga angukumbe, alioze Mwene Zambi yangulamwina. 14 Mwene Zambi kakungutakamisa; hangulamwina! 15 Banjikenu milolo ya uwahililo wa kukumba, mu mazuwo ja atu ja Zambi: Kwamba cho ngwo: “Mwene Zambi mwe walinga chino ni ndundo jenyi! 16 Hatukwasa kukumba mu jita, ni ndundo jenyi jahiana!” 17 Chichi kufwa, alioze mungutwama ni mwono, ni kwambujola yize Mwene Zambi halinga. 18 Hangumwesa lamba linji, alioze kangutayijile ko kufwa. 19 Ngwazulwilenu yikolo ya zuwo lia Zambi, hanga ngunjile mo nguchichimieke Mwene Zambi! 20 Chino chili chikolo cha zuwo lia Mwene Zambi, shina akwa ululi e maahasa kunjila mo! 21 Mwene Zambi, ngunakusakwilila mumu wanguvwile, wangukwashile kukumba! 22 Liwe lize alitunyine tungi, hiliabwa liwe lia mu mbango lize hakolesa zuwo. 23 Chuma chino alingile Mwene Zambi, chili cha kulishimwoka! 24 Lino lili tangwa lize atuhele Mwene Zambi, tuwahililenu ni chiseke! 25 Mwene Zambi, tulamwine, tulamwine kama! Aa Mwene Zambi, tuwahise! 26 Zambi awahise yoze uneza mu jina lia Mwene! Mu zuwo lia Mwene Zambi tunakuwahisa! 27 Mwene Zambi, mwe Zambi, hatwaha pangu. Kwatenu mitango ya mingaji mu moko jenu, nubutuke chiwanyino, jingenu che chilumbilo. 28 Yena uli Zambi yami, ngunakusakwilila, mungwambujola unene we. 29 Sakwililenu Mwene Zambi mumu kali mubema, zango lienyi kulichi kuhwa nichimwe. |
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
Bible Society of Zambia