Miaso (Masamu) 115 - Mukanda Wa Zambi 1970

Zambi yamwenemwene

¹ Mwene Zambi, uhenya ubwe kuli yena, kuli yena wika, hi kuli yetu ko, mumu ha zango lie lize kulishi kuhwa ni mumu ha umwenemwene we.

² Mumu yika mavungu akwo anatuhula ngwo; “Yolihi Zambi yenu?”

³ Zambi yetu mwilu ali, kakulinga yize yamuwahila.

⁴ Mazambi jo a oru ni prata, akulinga ni moko ja atu.

⁵ Makanwa akwete, alioze keeshi kuhanjika, meso akwete, alioze keeshi kumona,

⁶ Matwi akwete, alioze keeshi kwivwa, mazulu akwete, alioze keeshi kuhumbika,

⁷ Moko akwete, alioze keeshi kukwata, molu akwete, alioze keeshi kwenda; keeshi kuhasa kuhanjika liji nilimwe.

⁸ Eswe waze aalingile ni waze aakwasa mbunge, abwe kama ngwe ayo.

⁹ Yenu Aisraele shachilenu hali Mwene Zambi! Kali chikwashi chenu kanda lukebwe wenu.

¹⁰ Yenu mahako ja Zambi, shachilenu hali Mwene Zambi. Kali chikwashi chenu kanda lukebwe wenu.

¹¹ Yenu eswe waze nwakulemesa Mwene Zambi shachilenu hali iye, kali chikwashi chenu kanda lukebwe wenu.

¹² Mwene Zambi kakutwiwuluka, matuwahisa; makawahisa Aisraele ni mahako ja Zambi eswe.

¹³ Makawahisa eswe waze akumulemesa, chibwe atu alemu chibwe atu alelu.

¹⁴ Mwene Zambi anwehe ana, yenu ni vungu lienu!

¹⁵ Mwene Zambi yoze watangile lilu ni hashi anuwahise!

¹⁶ Mwilu mwambala mwa Mwene Zambi, alioze hashi yahana ho kuli atu.

¹⁷ Mwene Zambi keeshi kumuchichimieka kuli afu, kuli waze akupalumuka muma mwa kulungungaa

¹⁸ Alioze yetu, waze tuli ni mwono, mutusakwilila Mwene Zambi ndoo ni ku miaka yeswe. Chichimiekenu Mwene Zambi!