Miaso (Masamu) 112 - Mukanda Wa Zambi 1970

Uwahililo wa mukwa ululi

¹ Chichimiekenu Mwene Zambi! Kawaha mutu yoze wakulemesa Mwene Zambi, yoze wakuwahilila ni kufunga Shimbi jenyi.

² Ana jenyi maakabwa akwa tachi mu chifuchi cho, Zambi makaawahisa.

³ Akwa jiko lienyi maakabwa pichi anene, maamona yiwape ndoo ku miaka yeswe.

⁴ Akwa ululi pangu muliapangukila mu milima, kaali akwa keke, akwa utu, akwa ululi.

⁵ Kawaha yoze wakusondamisa akwo, yoze wakulinga milimo ni ululi.

⁶ Mukwa ululi kechi kukokoloka, atu maamwiwuluka matangwa eswe.

⁷ Keshi kwivwa mwongo chibwe anwambulwile sango jibi, mbunge yenyi yinajikiza, kakushachila hali Mwene Zambi.

⁸ Keshi kulibikala chibwe kwivwa woma; kananyingika ngwenyi, makakumba akwa kole jenyi.

⁹ Kakupangila yiswale yuma yenyi, kakulweza atu utu matangwa eswe; kumabwa mukwa tachi, ni atu maamusa vumbi.

¹⁰ Yingulungulu kaakuchimona, ni kaakwivwa wuli; kaakulicheka ku mazo, mba maafwafwa; keeshi ni Chuma cha kusako mbunge ndoo ku miaka yeswe.