Miaso (Masamu) 11 - Mukanda Wa Zambi 1970

Kushachila hali Mwene Zambi

¹ Nakuswama muli Mwene Zambi. Mumu yika nunambe ngwenu: “Humuka ngwe kajila, yako ku milundu,

² mumu yingulungulu haanana mata jo, kaanatondekeza mivwi yo ha ufuku hanga ase akwa ululi.

³ Mukwa ululi kahashile kulinga chuma nichimwe muze yuma yeswe hiyabiha?”

⁴ Mwene Zambi kali mu zuwo lienyi lia chijila, kali ni chitwamo chenyi cha wanangana mwilu. Kakutala atu eswe, kananyingika yize akulinga.

⁵ Mwene Zambi kakweseka akwa ululi ni yingulungulu, kakuvutwokela waze akulinga yibi.

⁶ Kakunokesa makala a kahia ni fundanga hali yingulungulu; kakwahehula ni kangonga ha chivukuminya.

⁷ Mwene Zambi kali mukwa ululi, kakuzanga ululi. Eswe waze akumwononokena kumaakabwa ku meso jenyi.