Miaso (Masamu) 109 - Mukanda Wa Zambi 1970

Kunenganyana cha umwe mukwa lamba

¹ Zambi ngunakuchichimieka kanda ulihulika!

² Yingulungulu ni akwa mahuza haangukatukila, kaakuhanjika mahuza hakutwala kuli yami.

³ Kaakuhanjika yuma yibi hakutwala kuli yami, kaakungukatukila, chitela chakuhi.

⁴ Chibwe nakwazanga ni kwalembela hindu kaakulimika ni yami.

⁵ Kaakunguhilwishila yibi ha yibema; yami nakwazanga, alioze ayo kaakunguvutwokela.

⁶ Tongola kama umwe chingulungulu, abatwile mukwa kole yami, umwe mukwa kole yenyi amusume kama mulonga.

⁷ Amubatwile kama ni kumuhisa; kulemba chenyi chalumuke milonga.

⁸ Matangwa ja mwono wenyi akehe kama, mutu mukwo atambule milimo yenyi.

⁹ Ana jenyi abwe kama ana a shiwa, pwo lienyi abwe tuliwa.

¹⁰ Ana jenyi abwe yendanganyi ni akwa kuunjila; ahange kama ku yikulo kuze atwama!

¹¹ Enya mikuli amubube kama yuma yenyi yeswe; yilambala atambule yuma yize hanayuku ku kukilikita chenyi.

¹² Mutu niumwe kanda amulweza kama utu, chibwe kulela ana jenyi waze mahichika.

¹³ Vungu lienyi eswe afwe kwo, jina lienyi likatoke kama mu Chisemuko cha kulutwe.

¹⁴ Mwene Zambi ewuluke kama milonga ya tushakulu twenyi, milonga ya naye kanda umukonekena yo.

¹⁵ Mwene Zambi ewuluka kama milonga yo matangwa eswe, alioze majina jo atoke liakulu.

¹⁶ Mutu yoze te kabwile ko ni manyonga akulweza atu utu nihakepe; milimo yenyi shina kuhungumiona ni kushiha yiswale, ni akwa kuhona, ni alelu.

¹⁷ Te kakushingana, neye amushinge kama! Te keshi kuzanga kuwahisa atu, neye kanda amuwahisa kama!

¹⁸ Kuli iye kushinga chabwile chashi ngwe kuzala hina, chimunjile kama mu mujimba weswe ngwe meya, chimunjile mu yifwaha ngwe maji!

¹⁹ Chimufuke ngwe hina, chimulalaminye ngwe muya!

²⁰ Mwene Zambi mwesa kama akwa kole jami lamba lize, atu waze akuhanjika yibi hali yami.

²¹ Alioze Mwene Zambi, Zambi yami, ngukwase kama ngwe chize walakenyene, ngulamwine kama mumu ha zango lie liahiana.

²² Nguli mukwa lamba, nguli mukwa kuhona; nguli ni chinyengo chinji.

²³ Ngunambe kutoka ngwe chize chizulie chakutoka ha chingoloshi; ngunahehuka ngwe chize akuhehuka pasu ni fuji.

²⁴ Hinalekumuka mu molu mumu Chishi kulia, hinasala yifwaha yamokomoko.

²⁵ Muze atu akungumona kaakunguseha, ni kuhunga mitwe yo.

²⁶ Aa Mwene Zambi, Zambi yami, nalemba ngukwase kama; ngulamwine kama mumu ha zango lie lize kulishi kuhwa.

²⁷ Akwa kole jami anyingike ngwo, yena wakungulamwina.

²⁸ Chibwe ayo maangushinga, hindu yena muunguwahisa. Atu waze akunguhungumiona evwe kama sonyi, yami kavumbi ke, nguwahilile.

²⁹ Akwa kole jami evwe sonyi jinji; ajizale ngwe mahina.

³⁰ Munguchichimieka Mwene Zambi ni liji lia tachi, mungumusakwilila mu Chikungulwila,

³¹ mumu iye wakuhakwila yiswale, ni kwalamwina kuli waze akuzanga kwashiha.