Miaso (Masamu) 108 - Mukanda Wa Zambi 1970

Kulemba: “Mwene Zambi ngupulule kama kuli akwa kole jami”

¹ Zambi ngunashachila hali yena; mungukwimbila ni kukuchichimieka! Mbunge yami jikiza!

² Tulialia twami hanjikenu! Munguvumbula lie tangwa!

³ Aa Mwene Zambi, mungukufumanyisa hakachi ka mavungu! Mungukwimbila ni kukuchichimieka ku meso ja atu!

⁴ Zango lie lize kulishi kuhwa kuliakuheta ndoo kwilu; umwenemwene we ndoo ku malelwa.

⁵ Aa Zambi, solola unene we kwilu, ni uhenya we hashi heswe!

⁶ Tulamwine ni ndundo je, kumbulula kama kulemba chetu, hanga utupulule yetu waze wakuzanga.

⁷ Zambi mu zuwo lienyi hanambe ngwenyi: “Yami, mukwa kukumba, mungukatetela atu jami limbo lia Shekeme, ni chikulo cha Sukote.

⁸ Yifuchi ya Gileade ni Manase yili niyami; chifuchi cha Efraime chili chifulu chami cha jita, chifuchi cha Yuda chili lukanda wami wa wanangana.

⁹ Alioze chifuchi cha Moabe muchikabwa mbashila yami ya kusanyina, Mungusa sapato jami mu chifuchi cha Edome ngwe chilayi chize chinalumbunuka ngwo, nichami. Kuma Afilistia kaakunyonga ngwo, maatukumba, nyi?”

¹⁰ Aa Zambi, iya mangunjisa mu lie limbo liakukoleka? Iya mangutwala kama ku chifuchi cha Edome?

¹¹ Kuma chamwenemwene hiunatwehuka, nyi? Kuuchi kutuhuka hamwe ni tujita twetu, nyi?

¹² Tukwase kama twase jita ni akwa kole jetu, mumu kukwasa cha atu chili chamokomoko!

¹³ Hamwe ni yena Zambi mutulinga kanawa, mutukumba akwa kole jetu!