Miaso (Masamu) 107 - Mukanda Wa Zambi 1970

Mukanda Wa Muchitano ( Mia 107—150 ) Chichimiekenu Zambi

¹ Sakwililenu Mwene Zambi mumu kali mubema, zango lienyi kulishi kuhwa nichimwe.

² Atu eswe waze Mwene Zambi hanalamwina, amuchichimieke nawa ni nawa, hanaalamwina ku moko ja akwa kole jo,

³ hanaachiza ku yifuchi ya yilambala, ku chivumbuko ni ku chitokelo, ni ku norde, ni ku sude, hanaahilwisa mu chifuchi cho.

⁴ Amwe yaatutujoka mu puya, kaamwene ko jila ya kuheta ku limwe limbo akatwame mo.

⁵ Yeevwa pwila ni zala, yaamba kufwa.

⁶ Mba mu lamba lio yaateta kuli Mwene Zambi, neye yaalamwina ku kubinda cho.

⁷ Yaatwala mu jila yalulama ndoo ni mu limbo lize mahasa kutwama.

⁸ Asakwilile Mwene Zambi mumu ha zango lienyi lize kulishi kuhwa. Mumu ha yikomokeso yize aalingilile.

⁹ Kakunwisa waze ali ni pwila, kakukuchisa waze anevu zala.

¹⁰ Amwe yaabwa funge akukasa ni ngoji ja utale, yaamona lamba mu milima kuhiana,

¹¹ mumu akolemene Shimbi ja Zambi, Mukwa Ndundo Jeswe, ni yaalituna longeso lienyi.

¹² Yaahonga chinji mumu ha kukilikita chikolo; yaalimbwoka hashi, wakuhi yoze waakwashile.

¹³ Mba mu lamba lio yaateta kuli Mwene Zambi, neye yaalamwina ku kubinda cho.

¹⁴ Yaatuhwisa mu lamba lio ni mu milima yo, yabatwola ngoji jo ja utale.

¹⁵ Asakwilile Mwene Zambi mumu ha zango lienyi lize kulishi kuhwa, mumu ha yikomokeso yize aalingilile.

¹⁶ Kakushiha yajilo ya unengu, kakumakwona yikungo ya utale.

¹⁷ Amwe te kaali yihepuke waze amwene lamba, mumu ha shili ni milonga yo.

¹⁸ Yeevwa ngenye ha kulia, yaamba kufwa.

¹⁹ Mba mu lamba lio yaateta kuli Mwene Zambi, neye yaalamwina ku kubinda cho.

²⁰ Yaawuka ni liji lienyi, yaalamwina ku kufwa.

²¹ Asakwilile Mwene Zambi mumu ha zango lienyi lize kulishi kuhwa, mumu ha yikomokeso yize aalingilile.

²² Amusakwilile ni milambu; ambujole yeswe yize alingile ni miaso ya uwahililo.

²³ Atu amwe yeendangana mu maulungu ha kalunga lwiji, yaalingalinga milimo yo ha meya.

²⁴ Yaamona yuma yize Mwene Zambi alingile, yikomokeso yenyi ha tulunga lwiji.

²⁵ Ni liji limuwika, yavundula fuji ya kangonga, ni miavu ya meya.

²⁶ Fuji yiizundula maulungu ha meya, yiiyaashimbamisa nawa mu meya. Mu lamba ngwe lize malunga yaalekumuka;

²⁷ yaabengwoka, yaabwa ngwe waze anazenge walwa, mana jo yaasula.

²⁸ Mba mu lamba lio yaateta kuli Mwene Zambi, neye yaalamwina ku kubinda cho.

²⁹ Yakanjisa kangonga ahole, mba miavu yiihola.

³⁰ Yaawahilila muze miavu hiyahola, neye yaahetesa ku chau chize azangile.

³¹ Asakwilile Mwene Zambi mumu ha zango lienyi lize kulishi kuhwa, mumu ha yikomokeso yize aalingilile.

³² Amufumanyise mu Chikungulwila, amuchichimieke mu mbunga ya miata.

³³ Mwene Zambi yalumuna njiji ngwe puya, yomisa ana a njiji ngwe mavu omu.

³⁴ Mavu a chinuno yaalumuka ngwe puya ya mungwa, mumu ha ungulungulu wa atu waze abwile ko.

³⁵ Puya yaajalumuna njiji, mavu omu yaalumuna ana a njiji.

³⁶ Yaatayiza akwa zala kutwama ko ni kutunga ko limbo lio.

³⁷ Yaalima minda, yaatumba ko vinyu; ye minda yiyima mihuko yinji.

³⁸ Yaawahisa, yaapwisa anji kuhiana; yimuna yo kuyakehele ko.

³⁹ Muze akwa kole haakumba atu ja Zambi, muze haalelesa ni lamba ni uswii,

⁴⁰ Zambi yalelesa akwa kwahungumiona, yaatutujola mu puya muze kumushi jila.

⁴¹ Alioze yalamwina akwa kuhona mu lamba lio, yookesa kuhiana ngwe mapanga.

⁴² Akwa ululi kaakuchimona, ni kaakuwahilila, alioze yingulungulu eswe kaakuhola kuluu.

⁴³ Akwa mana anyonge kama yuma yino, atayize zango lia Mwene Zambi lize kulishi kuhwa.