Miaso (Masamu) 106 - Mukanda Wa Zambi 1970

Utu wa Mwene Zambi kuli atu jenyi

¹ Chichimiekenu Mwene Zambi! Sakwililenu Mwene Zambi mumu kali mubema; zango lienyi kulishi kuhwa nichimwe.

² Iya mahasa kulumbununa yitanga yenyi yinene yeswe? Iya mahasa kumuchichimieka kanawa?

³ Kawaha waze akufunga Shimbi jenyi, waze akulinga yize yinalite matangwa eswe.

⁴ Mwene Zambi, ngwiwuluke kama muze muukwasa atu je, ni yami ngulamwine muze unalamwina ayo.

⁵ Ngulweze kama yiwape ya atu je, ni yami nguwahilile ni kulikwiza hamwe no, mumu tuli nie.

⁶ Twavulumwine ngwe chize alingile tushakulu twetu, tuli lume kwetu atu abi, yingulungulu.

⁷ Tushakulu twetu mu Egiptu kaanyingikine ko ulumbunwiso wa yikomokeso ya Zambi; yaavulama zango lize aalwezele yisuho yinji; mba ku kalunga lwiji Muchila yaakatukila Mwene Zambi, Mukwa Ndundo Jeswe.

⁸ Hindu yaalamwina, ngwe chize alakenyene, hanga aalweze ndundo jenyi jahiana.

⁹ Yaambila kalunga lwiji Muchila, neye yoma chau; mba yazawisa atu jenyi ha mavu omu.

¹⁰ Yaalamwina ku moko ja waze te akwavutwokela, yaapulula kuli akwa kole jo.

¹¹ Alioze meya yaafuka e akwa kulimika no; kukwasalile mutu niumwe.

¹² Mba atu jenyi yaafuliela yilakenyo yenyi, yaamwimbila miaso ya uhaliso.

¹³ Alioze yaavulama nikawashi yitanga yenyi, kaashimbwilile ko kuyula chenyi.

¹⁴ Yeevwa usolo kuhiana mu puya, yeeseka Zambi.

¹⁵ Kashika yaaha yize te akwita, alioze yaatumina nawa misongo yibi.

¹⁶ Muze mu puya yeevwila Mose ni Arone, kavumbi ka Mwene Zambi, ukwa.

¹⁷ Mba hashi yihabakuka, yihaminya Datane, yihafuka Abirame ni akwa jiko lienyi.

¹⁸ Kahia yikahulumukina hali waze te akwakaula, yikocha e yingulungulu.

¹⁹ Yaafula mwana ngombe wa oru ku mulundu wa Sinai, yaamuwayila.

²⁰ Kaalemesene ko Zambi, alioze yaawayila hamba walifwa ni kashitu yoze wakulia yambu.

²¹ Yaavulama Zambi yoze waalamwinyine ni yitanga ya ndundo mu chifuchi cha Egiptu.

²² Yalinga ko yitanga yinene! Yalinga yikomokeso kuze ku kalunga lwiji Muchila!

²³ Zambi yazanga kushiha atu jenyi, alioze Mose kavumbi kenyi yoze atongwele yamulembejeka, kashika kaashihile ko mu ufwatulo wenyi.

²⁴ Yeehuka chifuchi chibema, mumu kaafulielele ko chilakenyo cha Zambi.

²⁵ Yaatwama mu mazuwo jo a makubu nikulinyenyeta kaabanjikile ko Mwene Zambi.

²⁶ Kashika yaashinga ngwenyi, makaashihila mu puya,

²⁷ ni kumwangina vungu lio hakachi ka mavungu akwo hanga akafwile mu yifuchi ya yilambala.

²⁸ Mba atu jenyi yaalifutula kuli Bale ni mavungu akwo ku mulundu wa Peore, yaalia milambu yize te akulambula kuli mazambi waze te keeshi mwono.

²⁹ Yeswe yize alingile, Zambi yaayivwila ufwatulo, mba misongo yibi yiyaahulumukina.

³⁰ Alioze Finehase yakatuka, yamwesa e yivulumunyi lamba, mba misongo yiihwa.

³¹ Atu kakumuchichimieka ndoo ni musono, mumu ha yeswe yize alingile, ni kumamuchichimieka matangwa eswe.

³² Atu ja Mwene Zambi yeevwisa Mwene Zambi ufwatulo ku mashima ja Meriba, mba Mose yachimwena lamba.

³³ Yaamuvwisa kubiha mu mbunge, mba yahanjika yize kuyalitele.

³⁴ Aisraele kaashihile ko mavungu akwo ngwe chize ambile Mwene Zambi,

³⁵ alioze yaalimbata no, yeembulula nawa ndako jo.

³⁶ Atu ja Zambi yaakombelela mahamba, mba yaafwafwa.

³⁷ Yaashiha ana jo a malunga, ni a mapwo ni kwalambula milambu ku mahamba ja Akanana.

³⁸ Yaashiha ana waze te keeshi kwo yitela; chenacho abihishile chifuchi cho.

³⁹ Yaalumuka yingulungulu mumu ha ye yitanga yino, yeehuka Zambi.

⁴⁰ Chenacho Mwene Zambi evwilile atu jenyi ufwatulo, yeevwila kuzelwoka.

⁴¹ Mba yaakunjika ku moko ja mavungu akwo, yaayula kuli akwa kole jo.

⁴² No yaamwesa lamba linji, yaazeyesa liakulu.

⁴³ Yisuho yinji te Mwene Zambi akulamwina atu jenyi, alioze ayo yaamukatukila, yaalishinda hashi ni yibi yo.

⁴⁴ Hindu Mwene Zambi yeevwila muze atetele kuli iye, yamona lamba lio.

⁴⁵ Yanyonga Usendo uze akolesele no, yalumuna mbunge yenyi mumu ha zango lienyi liahiana.

⁴⁶ Yashinjika akwa kwabinjisa hanga eevwile keke.

⁴⁷ Mwene Zambi, Zambi yetu, tulamwine, tuchize kama hakachi ka mavungu akwo. Mba utuhilwise mu chifuchi chetu, tusakwilile ni kufumanyisa jina lie.

⁴⁸ Chichimiekenu Mwene Zambi, Zambi ya Aisraele! Muchichimiekenu chize musono ndoo ku miaka yeswe! Atu eswe ambe ngwo: “Chibwe kama Chenacho!” Chichimiekenu Mwene Zambi!