Miaso (Masamu) 105 - Mukanda Wa Zambi 1970

Zambi ni atu jenyi

¹ Sakwililenu Mwene Zambi, mufumanyisenu; lwezenu mavungu yitanga yenyi.

² Mwimbilenu Mwene Zambi ni kumuchichimieka, ambululenu yuma ya kukomwesa yize hanalingi.

³ Tuwahililenu mumu tuli nienyi, eswe waze akumuwayila, awahilile!

⁴ Kundamenu kuli Mwene Zambi hanga atukwase, tumuwayilenu matangwa eswe.

^5-6 Yenu vungu lia Abrahama, kavumbi ka Zambi, yenu vungu lia Yakoba, mutu yoze atongwele Zambi, iwulukenu yilayi yize Zambi hanalingi, ni chize abatwilile atu.

⁷ Mwene Zambi kali Zambi yetu, Shimbi jenyi jili ja akwa hashi eswe.

⁸ Makafunga Usendo wenyi ndoo ku miaka yeswe, kechi kuvulama yilakenyo yenyi ndoo ku kanunu ka yisemuko.

⁹ Mafunga Usendo wenyi uze akolesele ni Abrahama, ni chilakenyo chize alakenyene Isake.

¹⁰ Mwene Zambi yakolesa Usendo ni Yakoba, uze muulinduluka ndoo ku miaka yeswe.

¹¹ Ngwenyi: “Mungukakwaha chifuchi cha Kanana, muchikabwa chihinga che.”

¹² Atu ja Zambi te achili akepe, te njize mu chifuchi cha Kanana.

¹³ Yaatutujoka sali ni sali, chize ku chifuchi chimwe ndoo ku chifuchi chikwo.

¹⁴ Alioze Zambi katayijile ko niumwe kwahungumiona, yakanyamisa mianangana ngwenyi:

¹⁵ “Tuvumbi twami waze natongwele, kanda nwaalinga chibi, kanda numwesa akwa munanyi jami lamba!”

¹⁶ Mwene Zambi yatuma zala yinji mu chifuchi cho, yachiza yakulia yo yeswe.

¹⁷ Alioze yaatumina umwe lunga kulutwe lio. Josefe yoze alanjishile mu undungo.

¹⁸ Yamukasa ni ngoji ja utale ku molu, yaasa kota yenyi mu kuli,

¹⁹ ndoo ni muze yuma yize Zambi alakenyene yamanunukine, ni yasoloka pundu ngwo, Josefe keshi kwenyi mulonga.

²⁰ Mba mwanangana wa Egiptu yamukasulula ngoji, mukwa kuyula mavungu yamutusula.

²¹ Yamupwisa mwata wa akwa lutwe jenyi eswe, kanda mukwa kuyula chifuchi chenyi cheswe.

²² Yamusa helu lia yilolo jenyi; yamwaha chiyulo cha kulongesa akwa mana jenyi.

²³ Mba Yakoba yaya ku chifuchi cha Egiptu, yatunga ko.

²⁴ Mwene Zambi yahana ana anji kuli atu jenyi, yaatakamisa kuhiana akwa kole jo.

²⁵ Yakalisa mbunge ja akwa Egiptu hanga avutwokele atu jenyi, ni kwonga tuvumbi twenyi.

²⁶ Mba Mwene Zambi yatuma Mose kavumbi kenyi, ni Arone yoze atongwele.

²⁷ No yaalinga ko yikomokeso ni yilayi ya Zambi.

²⁸ Mwene Zambi yatuma milima mu chifuchi, alioze akwa Egiptu kaafungile ko Shimbi jenyi.

²⁹ Ngiji jo yajalumuna manyinga, yashiha yishi jo eswe.

³⁰ Chifuchi cho yichizala ni yula ya mbwota, ni mwe mu zuwo lia mwanangana.

³¹ Mwene Zambi yaamba, mba mazaji a jiji ni yina yaazala mu chifuchi cheswe.

³² Yatuma vula wa chiwe ni mihenyo mu chifuchi cho, alioze kaatuminyine ko vula mubema,

³³ yiibatwola mitondo ya vinyu ni mikuyu ya mu minda yo, yamakwona mitondo yeswe ya mu chifuchi cho.

³⁴ Yaamba makumbi, mba yikwiza anji, kahashile ko kwalula.

³⁵ Yaalia mitondo yeswe ya mu chifuchi cho ni yeswe ya mu minda.

³⁶ Zambi yashiha ana malunga eswe atangu kusemuka a mu Egiptu.

³⁷ Mba Mwene Zambi yatuhwisa Aisraele mu Egiptu, yaambata prata ni oru, eswe yaatakama.

³⁸ Akwa Egiptu yaawahilila muze Aisraele atuhukile, mumu te kaakwevwila woma.

³⁹ Zambi te kakufunga atu jenyi ni lelwa, ha ufuku te kaakwapangulwisa ni kahia.

⁴⁰ No yaamwita yuma yakulia, neye yaaha tujila, tumbangu. Yaaha nawa mbolo yize yahulumukine mwilu; no yaalia, yaakuta.

⁴¹ Yabula liwe, mba meya yaapukumuka, yeenda mu puya ngwe lwiji.

⁴² Yewuluka chilakenyo cha chijila chize alakenyene kuli kavumbi kenyi Abrahama.

⁴³ Mba yatuhwisa atu jenyi waze atongwele; no yeembamba ni kukololoka ni chiseke.

⁴⁴ Zambi yaaha yifuchi ya mavungu akwo, yaatayiza kutambwola minda yo.

⁴⁵ Chenacho alingile, hanga atu jenyi afunge Shimbi jenyi ni yiyulo yenyi. Chichimiekenu Mwene Zambi!