Miaso (Masamu) 102 - Mukanda Wa Zambi 1970

Kulemba cha mukwa lamba

¹ Aa Mwene Zambi, banjika kama kulemba chami, ivwa kama kulila chami, ungukwase!

² Kanda ungumba nyima muze nguli mu lamba! Ngubanjike kama, ungukumbulule nikawashi muze ngunakutambika!

³ Mwono wami unajimuka ngwe mwishi, mujimba wami unasasaminya ngwe kahia.

⁴ Hinabwa ngwe mwambu umu; chisolo kwivwa nawa mate a kulia.

⁵ Ngunatu mikuma, hinasala yifwaha yamokomoko.

⁶ Nguli ngwe kajila mu puya, ngwe chikungulu mu yikulu.

⁷ Chishi kuya tulo, nguli ngwe ndalamusepe yoze unatwama ha fulumba lia zuwo.

⁸ Akwa kole kaakungushililika tangwa lieswe; atu waze akungusaula, kaakungutuka.

^9-10 Mumu ha ufwatulo ni utenu we, uto hiwalumuka yakulia yami; masoji jami haabwa meya jami akunwa. Hiwanguzundula ni kungunyasa hashi.

¹¹ Mwono wami hiwabwa ngwe chizulie cha chingoloshi; hinoma ngwe mwambu.

¹² Alioze yena Mwene Zambi, uli mwanangana ndoo ku miaka yeswe; yisemuko yeswe maakwiwuluka.

¹³ Muukatuka ni kuvwila akwa Zione keke; tangwa hiliazuka ha kweevwila vumbi, tangwa lize wasele hiliaheta kulu.

¹⁴ Tuvumbi twe kaakuzanga limbo lia Zione chibwe haalionona; kaakulivwila keke chibwe hiliabwa likulu.

¹⁵ Mavungu meevwila Mwene Zambi woma; mianangana eswe a hashi meevwila ndundo jenyi mwongo.

¹⁶ Muze Mwene Zambi matungulula limbo lia Zione, masolola ulemu wenyi.

¹⁷ Kumevwa atu jenyi waze ehukile, mabanjika kulemba cho.

¹⁸ Yize ambile Mwene Zambi chatamba kuyisoneka, hanga atu waze kanda achisemuka akamuchichimieke.

¹⁹ Mwene Zambi muze muma lienyi mwilu mwa chijila yatala hashi.

²⁰ Yevwa kuteta cha funge, yatusula waze abatwilile ngwo, chaatamba kufwa.

²¹ Chenacho atu maambujola jina lia Mwene Zambi mu Zione, maamuchichimieka mu Yerusaleme

²² muze mavungu ni mawanangana maalikungulula ni kuwayila Mwene Zambi.

²³ Mwene Zambi hangupwisa mulelu shimbu nguchili mukweze; hakehesa matangwa ja mwono wami.

²⁴ Aa Zambi, kanda ungutambula kama mwono wami nikawashi muze kanda nguchikola. Aa Mwene Zambi yena uli mukwa mwono ndoo ku miaka yeswe;

²⁵ ha Ubutukilo yena watangile hashi, yena nawa watangile lilu ni moko ja yena mwene.

²⁶ Yuma yino yeswe muyikahwa, alioze yena muukalinduluka. Yeswe muyikalumuka ngwe yibuzu. Muukayimbila ngwe mahina, yeswe muyikatoka.

²⁷ Alioze yena cheswe ubwa chizechene, mwono we kuushi kuhwa.

²⁸ Ana jetu maakabwa mu uhwimino, ni ku kufunga che ana jo nawa maakabwa mu uhwimino.