Miaso (Masamu) 10 - Mukanda Wa Zambi 1970

Kulemba: “Mwene Zambi batula kama ni ululi”

¹ Aa Mwene Zambi, mumu yika uli kusuku chichize? Mumu yika unaswame muze tuli mu lamba?

² Yingulungulu kaakulengumuka, kaakumwesa yiswale lamba; afwe kama mu miheto yize atele ayo ene.

³ Chingulungulu kakulengumuka mu manyonga jenyi abi, mukwa kuzo kakushililika ni kulituna Mwene Zambi.

⁴ Chingulungulu keshi kufupa Zambi; mu kulengumuka chenyi kakulelesa Zambi.

⁵ Chingulungulu kakuyuka mu yuma yeswe. Keshi kunyingika ubatwilo wa Zambi; kakulelesa akwa kole jenyi.

⁶ Kakulihanjikisa ngwenyi: “Chichi kulimbuka nichimwe; chichi kamona lamba nihakepe.”

⁷ Mu kanwa mwakutuhuka kushililika, ni mahuza, ni mihalo; kakulipupwisa kuhanjika maliji a shili ni a ungulungulu.

⁸ Kakuswama mu yihunda, nikujikinyina waze keeshi milonga. Kakuhulikila meso hali yoze anambe kushiha;

⁹ kakuswama mu chivwenge chenyi ngwe tambwe. Kakujikinyina akwa lamba; kakwooza mu muheto wenyi ni kuya no.

¹⁰ Atu waze kaakubomba ngwe tupaza, haakumba ku tachi jenyi.

¹¹ Chingulungulu kakulihanjikisa ngwenyi: “Zambi keshi kwalula yize nakulinga! Kakufuka ku meso jenyi, keshi kungumona!”

¹² Aa Mwene Zambi, katuka kama, olola kwoko lie, kanda uvulama akwa lamba!

¹³ Ngwe kuchi chingulungulu mahasa kulelesa Zambi, ni kulihanjikisa ngwenyi: “Kechi kungumwesa lamba”?

¹⁴ Alioze yena Wakumona, unanyingika lamba ni luyinda, matangwa eswe wakululika ni kukwasa. Mukwa lamba kakulikunjika kuli yena; yena uli chikwashi cha shiwa.

¹⁵ Makuna moko ja yingulungulu; amwese lamba mumu ha yibi yize haanalingi ndoo keechi kayilinga nawa.

¹⁶ Mwene Zambi kali mwanangana ndoo ku miaka yeswe. Waze akuwayila mazambi eka kumaakatoka mu chifuchi cha Zambi.

¹⁷ Aa Mwene Zambi, muubanjika ku kuliumba cha alelu; yena muwaatakamisa.

¹⁸ Muubanjika kulila cha akwa lamba ni shiwa; muwaabatwila ni kwasambisa, hanga akwa hashi keechi kwakolesa nawa woma.