Mateu 7 - Mukanda Wa Zambi 1970

Kanda nuhisa akwenu

¹ “Kanda nuhisa akwenu. Nyi ka, Zambi makanuhisa.

² Mumu Zambi makanuhisa nikulita ni chize nwakuhasa akwenu. Makanwesekela yeseko yize nunesekela akwenu.

³ Kuchi unatale koma kaze kali mu liso lia mukwenu, alioze kuushi kwalula mukambo uze uli mu liso lie?

⁴ Ngwe kuchi muuhasa kwambila mukwenu ngwe: ‘Ngweche nguchize koma mu liso lie,’ alioze yena mwene uli ni mukambo mu liso lie?

⁵ Chilembekese! Chiza hatangu mukambo mu liso lie, mba muumona zwalala ha kuchiza koma mu liso lia mukwenu.

⁶ “Kanda nuhana yize ya chijila kuli tuwa. Nyi ka, maanutewulukila, maanuzamwona ni mazo. Kanda numbila kakanga kenu ku meso ja ngulu. Nyi ka, maakaliata.”

Etenu, fupenu, ngongwelenu

⁷ “Etenu, mba kumunutambula; fupenu, mba kumunuwana; ngongwelenu, mba kumanwazulwila.

⁸ Mumu mutu mweswe wakwita, kakutambula; yoze Wakufupa, kakuwana; yoze wakungongwela, kakumwazulwila.

⁹ Mutu muka hakachi kenu, nyi mwanenyi mamwita mbolo, mamwaha liwe?

¹⁰ Hanji, nyi meta yishi, mamwaha lunoka?

¹¹ Nyi yenu abi, nunanyingika kwaha ana jenu yuma yibema, kuma Tatenu wa mwilu kechi kaaha waze maamwita yuma yibema, nyi?

¹² “Lingilenu atu akwo yibema, ngwe chize nunazange ayo anulingile. Yenayo Shimbi ja Mose ni longeso lia akwa munanyi a Zambi.”

Chikolo chikepe

¹³ “Njililenu ku chikolo chikepe. Mumu chikolo chize chakutwala ku kwonona chili chinene, ni jila yili yashi, ni waze akunjila mo kaali anji.

¹⁴ Alioze chikolo chize chakutwala ku mwono chili chikepe, ni ye jila yikalu, ni waze akuyiwana kaali akepe.”

Mutondo ni mihuko yawo

¹⁵ “Nukanyama mumu hali akwa munanyi a kupiangula. Kaakunusolokela ngwe mapanga, alioze muchima kaali tungunga asasu.

¹⁶ Muunwanyingikina ku yitanga yo. Atu kaakuhela mihuko ya vinyu ku yibuta ya mingonga, nyi? Hanji makuyu (figu) ku mikalale, nyi?

¹⁷ Mutondo Ubema wakwima mihuko yibema, alioze mutondo ubi wakwima mihuko yibi.

¹⁸ Mutondo Ubema kuwahashile kwima mihuko yibi, ni mutondo ubi kuwahashile kwima mihuko yibema.

¹⁹ Mutondo weswe uze kuushi kwima mihuko yibema, maakaubatula, maakaumbila mu kahia.

²⁰ Chenacho nawa, mununyingika akwa munanyi a kupiangula ku yitanga yo.”

Chanunyingikine nilimwe tangwa

²¹ “Hi eswe ko waze akunguvuluka ngwo: ‘Mwene, Mwene!’, maakanjila mu Wanangana wa mwilu, alioze shina waze akulinga upale wa Tata wa mwilu.

²² Ha tangwa lize anji maakanguhula ngwo: ‘Mwene, Mwene! Hi yetu ko te twakwambujola mu jina lie, nyi? Hi yetu ko te twakutuhwisa mwiku wa luchisa mu jina lie, nyi? Hi yetu ko te twakulinga yilayi yinji mu jina lie, nyi?’

²³ Mba mungukaakumbulula ngwami: ‘Chanunyingikine nilimwe tangwa. Ngukatukenu yenu nwakulinga yibi!’ ”

Tungi aali

²⁴ “Kashika, mutu yoze wakwivwa maliji jami ni kwalinga, kalifwa ni mukwa kukanyama yoze watungile zuwo lienyi ha luliwe.

²⁵ Vula yanoka, mihuji yiiyiza, fuji yiihuhwa ha zuwo lize. Alioze kuliabuzukile, mumu yalitunga ha luliwe,

²⁶ Mutu yoze Unevu maliji jami, alioze keshi kwalinga, kalifwa ni chihepuke yoze watungile zuwo lienyi ha masekeseke.

²⁷ Vula yanoka, mihuji yiiyiza, fuji yiihuhwa ha zuwo lize, mba yilibuzuka chikolo lume!”

Chiyulo cha Yesu

²⁸ Muze Yesu hamanununa maliji wano, mbunga yaalishimwoka kuhiana ha longeso lienyi.

²⁹ Mumu kabwile ko ngwe alongeshi jo a Shimbi, alioze yalongesa ni chiyulo.