Mateu 6 - Mukanda Wa Zambi 1970

Longeso hakutwala ku kuhana cha yawana kuli yiswale

¹ “Kanyamenu, kanda nulinga yitanga yenu ya ululi ni mazangi ku meso ja atu. Nyi ka, kunuchi katambula nichimwe kuli Tatenu a mwilu.

² “Kashika, muze muuhana yawana kuli yiswale, kanda wimba chitavwi kulutwe lie ngwe chize akulinga yilembekese mu mazuwo a kuwayila ni mu majila. Kaakuchilinga hanga atu aalemese. Chamwenemwene ngunanwambulwila ngwami, haanatambula kulu fweto yo.

³ Alioze yena, muze muuhana yawana kuli yiswale, Chilinge ni mana hanga chibwe sepa lie munene kanda achinyingika.

⁴ Chenacho kuhana che chibwe ku tenga, ni Tatenu yoze Wakumona yize wakulinga ku tenga, makakukundulula.

Longeso hakutwala ku kulemba

⁵ “Muze munulemba Zambi, kanda nubwa ngwe yilembekese. Kaakuzanga kulemba nikumana mu mazuwo a kuwayila ni ha makano ja majila hanga atu eswe aamone. Chamwenemwene ngunanwambulwila ngwami, haanatambula kulu fweto yo.

⁶ Alioze yena, muze muulemba, njila mu chibatulo che cha muchima. Nyi muze hiwajila chajilo, lemba kuli Tatenu yoze uli ku tenga. Mba Tatenu, yoze Wakumona yize wakulinga ku tenga, makakukundulula.

⁷ “Muze munulemba, kanda nulemba ni maliji anji ngwe chize akulinga waze keeshi kufuliela. Kaakunyonga ngwo, Zambi matwivwa mumu ha kuhanjika chetu chinji.

⁸ Kanda nulifwa no, mumu Tatenu kananyingika chikala chize nuli nacho shimbu kanda nuchimwita.

⁹ Lembenu ngwe chino: ‘Tata yetu wa mwilu, alemese jina lie.

¹⁰ Wanagana we wize, upale we ulingiwe hano hashi ngwe chize unalingiwa mwilu.

¹¹ Twehe kama musono yakulia yize yinalite.

¹² Tukonekene kama milonga yetu, ngwe chize yetu twakukonekena waze haanatulingi yibi.

¹³ Kanda ututwala kama ku yeseko yikalu, alioze tufunge kama kuli mwe Mubi’. (Mumu we Wanangana, ni je tachi, ni we uhenya, yeswe niye ndoo ku miaka yeswe. Chibwe kama Chenacho.)

¹⁴ “Mumu, nyi munukonekena atu milonga yo, tatenu wa mwilu neye manukonekena.

¹⁵ Alioze, nyi kunusolo kukonekena atu milonga yo, ni Tatenu kechi kanukonekena milonga yenu nihakepe.”

Longeso hakutwala ku kulitwamina kulia

¹⁶ “Muze munulitwamina kulia ha kuwayila Zambi, kanda nusoloka kubwa ni chinyengo ngwe chize akusweka yilembekese. Kaakwalumuka ku meso hanga asoloke kuli atu eswe ngwo, kaanalitwamina kulia. Chamwenemwene ngunanwambulwila ngwami, haanatambula kulu fweto yo.

¹⁷ Alioze yena, muze muulitwamina kulia ha kuwayila Zambi, Wayisa mutwe we, usane ku meso,

¹⁸ hanga atu keechi kunyingika ngwo, unalitwamina kulia. Shina Tatenu wika, yoze uli ku tenga, mwe machinyingika. Ni mwe Tatenu, yoze Wakumona yize wakulinga ku tenga, makakukundulula.”

Longeso hakutwala ku ubite mwilu

¹⁹ “Kanda nutulikila ubite hano hashi, haze ndulu ni ngengeya yaakwonona, haze eji akulokola mazuwo ni kwiya.

²⁰ Shinoho tulikilenu ubite mwilu, muze chibwe ndulu, chibwe ngengeya kuyahashile kwonona, muze eji kaahashile kulokola chibwe kwiya.

²¹ Mumu kweswako kuli ubite we, kweneko nawa mukubwa mbunge ye.”

Longeso hakutwala ku pangu lia mujimba

²² “Meso kaali ngwe pangu lia mujimba. Nyi meso je maabwa angunu, mujimba we weswe muupanguka.

²³ Alioze, nyi meso je maabwa chitalawili, ni mujimba we weswe muubwa milima. Kashika, nyi pangu lize lili muli yena mulibwa lume milima, tala milima yibwa haha!”

Zambi ni ubite

²⁴ “Mutu niumwe mahasa kulingila miata aali. Mumu mavutwokela umuwika ni mazanga mukwo, hanji malihana kuli umuwika ni malelesa mukwo. Kunwahashile kulingila eswe aali Zambi ni mbongo hamuwika.”

Kanda nulibikala

²⁵ “Kashika ngunanwambe ngwami, kanda nulibikala ha mwono wenu, chize munulia ni chize mununwa, chibwe ha mijimba yenu, chize munuzala. Mwono kuwahiana yakulia, ni mujimba kuwahiana mahina, hi chocho ko, nyi?

²⁶ Talenu tujila waze akuhumuka mu tetela: keeshi kukuwa, keeshi kuhela, chibwe keeshi kukungila mu machila, alioze Tatenu wa mwilu kakwalisa. Yenu kunwahianyine tujila, nyi?

²⁷ Iya hakachi kenu, ha kulibikala, mahasa kuwezela yimwe miaka ku mwono wenyi?

²⁸ “Kuchi mba nwakulibikala ha chikuma cha mahina. Talenu chize yitemo ya mu yambu yakutatuka: kuyishi kuhondangana, chibwe kuyishi kulilingila mahina.

²⁹ Alioze ngunanwambulwila ngwami, chibwe mwanangana Solomone, mu uhenya wenyi weswe, kazalile ngwe chimwe cha yitemo yino.

³⁰ Nyi Zambi kakujika mwambu wa mu yambu uze unasoloka musono ni hamene maaumbila mu kahia, kuma kechi kanujika kuhiana, nyi? Ufulielo wenu uli ukepe.

³¹ Kanda nulibikala nikwamba ngwenu: ‘Chika mutulia?’ hanji ‘Chika mutunwa?’ hanji ‘Chika matuzala?’

³² Waze keeshi kufuliela kaakufupafupa yuma yize yeswe, ni Tatenu wa mwilu kananyingika ngwenyi, nuli nayo chikala.

³³ Shinoho achinyongenu hatangu Wanangana wa Zambi ni ululi uze anazange, mba makanuwezela yuma yize yeswe.

³⁴ Kashika kanda nulibikala ha tangwa lia hamene, mumu tangwa lia hamene ni yibikalo yalio. Tangwa ni tangwa linalite ni lamba lialio.”