Mateu 5 - Mukanda Wa Zambi 1970

Longeso lia ha mulundu

¹ Muze Yesu hamona mbunga jino, yakanduka ha mulundu, yatwama ho. Tumbaji twenyi yaamukundama.

² Neye yabutuka kwalongese maliji wano ngwenyi:

Uwahililo wamwenemwene

³ “Kaawaha waze akunyingika ngwo: ‘tuli yiswale mu mbunge,’ mumu Wanangana wa mwilu niwo!

⁴ “Kaawaha akwa kunenganyana, mumu Zambi kumakaalembejeka!

⁵ “Kaawaha yihomoboloji, mumu kumaakahinga chifuchi chize Zambi hanaalakenya!

⁶ “Kaawaha waze akwivwa usona wa ululi, ngwe zala ni pwila anevu, mumu Zambi makaakuchisa!

⁷ “Kaawaha akwa kwivwila akwo keke, mumu Zambi neye makeevwila keke!

⁸ “Kaawaha waze atoma mu mbunge, mumu kumaakamona Zambi!

⁹ “Kaawaha yitakanyishi, mumu Zambi kumakaaluka ngwenyi: ‘Ana jami!’

¹⁰ “Kaawaha waze anaahungumiona mumu ha ululi, mumu Wanangana wa mwilu niwo!

¹¹ “Kunwawaha muze atu maanuchoka, ni muze maanuhungumiona, ni muze maanulamikiza ungulungulu mumu hali yami.

¹² Likwizenu, wahililenu, mumu chawana chenu chinene chili mwilu, mumu Chenacho ahungu mionene akwa munanyi a Zambi waze aliangile.”

Mungwa ni pangu

¹³ “Nuli ngwe mungwa wa akwa hashi. Alioze, nyi mungwa hiwasamuka, neka mauyemesa nawa? Kuwalitele nichimwe shina kuumwangina haze, akauliate.

¹⁴ “Nuli ngwe pangu lia akwa hashi. Limbo lize linatungiwa ha mulundu, kuliahashile kuswama.

¹⁵ Atu keeshi kuwika ndeya ni kuyisa mushi lia kapaya, alioze kaakuyisa ha chikwachilo cha ndeya, mba muyitemwina eswe waze ali mu zuwo.

¹⁶ Chizechene pangu lienu chatamba kupanguka ku meso ja atu, hanga akamone yitanga yibema yize nwakulinga, akalemese Tatenu yoze uli mwilu.”

Longeso hakutwala ku Shimbi ja Mose

¹⁷ “Kanda nunyonga ngwenu, hinguneza ni kwonona Shimbi ja Mose chibwe longeso lia akwa munanyi a Zambi. Chejile ni kujonona, alioze ni kujimanununa.

¹⁸ Chamwenemwene ngunanwambulwila ngwami, ndoo lilu ni hashi muyikahwa, chibwe lusona umwe mukepe Wahiana wa ku Shimbi kechi kahwa nichimwe ndoo yize yeswe muyiza kubwa.

¹⁹ Kashika, yoze wakutangula chibwe Shimbi yikepe yahiana ya ku Shimbi ja Mose, ni kulongesa atu kutangula Shimbi yize yikepe, maakamuvuluka ngwo, mukepe Wahiana mu Wanangana wa mwilu. Alioze yoze mononokena Shimbi ja Mose ni kulongesa atu akwo kujilinga, maakamuvuluka ngwo: munene Wahiana mu Wanangana wa mwilu.

²⁰ Ngunanwambulwila ngwami: kunuchi kuhasa kunjila mu Wanangana wa mwilu shina ululi wenu muuhiana ululi wa alongeshi a Shimbi ni wa Afariseu.”

Longeso hakutwala ku ufwatulo

²¹ “Hinunevu chize Shimbi ja Mose jambilile tushakulu twetu ngwo: ‘Kanda ushiha mutu. Yoze mashiha mutu, matela ubatwilo!’

²² Alioze yami ngunanwambulwila ngwami, mutu yoze mevwila mukwo ufwatulo, matela ubatwilo. Yoze mambila mukwo ngwenyi: ‘Chihepuke!’ matela ubatwilo ku meso ja Mbunga ya Ngaji ja Ayuda. Yoze mamwamba ngwenyi: ‘Chizuzuke!’ kanatela kuya mu kahia.

²³ Kashika, nyi muulambula mulambu we ku chilumbilo, ni kuze muwiwuluka ngwe, mukwenu Chuma chimwe a kuli nacho,

²⁴ hichika ko mulambu we ku chilumbilo, yako hatangu ukawane ni mukwenu, mba ukahiluke ukalambule mulambu we.

²⁵ “Nyi mukwa kole ye kanakutwala kuli ngaji, eseka kulitese nenyi nikawashi shimbu muchili mu jila, muze kanda achikukunjika kuli ngaji. Nyi ka, mukwa kole ye makakukunjika kuli ngaji, ni ngaji makakukunjika kuli kafunga, ni kafunga makakumbila mu zuwo lia lamba.

²⁶ Chamwenemwene ngunakwambe ngwami, kuuchi katuhuka mo nichimwe ndoo ni muze hiwafweta kalumbongo ka kusula.”

Longeso hakutwala ku utanji

²⁷ “Hinunevu chize Shimbi ja Mose jambile ngwo: ‘Kanda Ulinga utanji.’

²⁸ Alioze yami ngunanwambulwila ngwami, mutu yoze matala pwo lia mbala ni kumuvwila usolo, halinga kulu nenyi utanji mu mbunge yenyi.

²⁹ Nyi liso lie lia chindume mulikuvulumwisa, litombongone, ulimbile. Mumu shinoho utokese Chihanda chimuwika, kuchina mujimba we weswe akaumbile mu kahia.

³⁰ Nyi kwoko lie lia chindume mulikuvulumwisa, Ubatule, ulimbile. Mumu shinoho utokese Chihanda chimuwika, kuchina mujimba we weswe akaumbile mu kahia.”

Longeso hakutwala ku kushiha cha ulo

³¹ “Shimbi jambile nawa ngwo: ‘Lunga yoze malakula pwo lienyi chatamba kumwaha mukanda wa kulakula.’

³² Alioze yami ngunanwambulwila ngwami, lunga yoze malakula pwo lienyi (shina ha chikuma cha utanji), mamupwisa chitanji, nyi pwo yoze maya ulo weka. Chikwo nawa, mweswe mambata pwo yoze hanalakula, malinga utanji.”

Longeso hakutwala ku mashingo

³³ “Hinunevu nawa chize Shimbi ja Mose jambilile tushakulu twenu ngwo: ‘Kanda ulishinga ni mahuza, alioze manununa chize hiunalakenya ni Shingo ku meso ja Mwene Zambi,’

³⁴ Alioze yami ngunanwambulwila ngwami, kanda ulishinga nichimwe, chibwe ni lilu, mumu lili ngwe chitwamo cha wanangana cha Zambi;

³⁵ chibwe ni hashi, mumu hali ngwe homa haze akunangika molu jenyi; chibwe ni Yerusaleme, mumu lie limbo lia Mwanangana munene.

³⁶ Kanda ulishinga chibwe ni mutwe we, mumu kuwahashile kupwisa lukambu niumwe mutoma chibwe mulaa.

³⁷ Ambenu lume ngwenu: ‘Ewa’ hanji ‘Ka’—yeswe yize yahiana yakukatuka kuli mwe Mubi.”

Longeso ha kukala cha milonga

³⁸ “Hinunevu chize Shimbi ja Mose jambile ngwo: ‘Nyi umwe halokola mukwo liso, neye amulokole lio. Nyi umwe habukula mukwo lizo, neye amubukule lio.’

³⁹ Alioze yami ngunanwambulwila ngwami, kanda nukala milonga kuli yoze makulinga yibi. Nyi umwe makulamba mbangala ha tafu lia chindume, mutewulwile nawa likwo.

⁴⁰ Nyi umwe mazanga kukusuma mulonga atambule mbinja ye (kazaku ke), mwechele nawa chikuto che.

⁴¹ Nyi umwe mukwa kuyula makushinijka ni tachi ha kuya nenyi kilometro yimuwika, yako nenyi nawa ya muchaali.

⁴² Hana kuli yoze makwita, kanda umina yoze makutambula mukuli.”

Longeso ha kuzanga akwa kole

⁴³ “Hinunevu chize alongeshi akwo ambile ngwo: ‘Zanga mwenyembo we, alioze vutwokela mukwa kole ye.’

⁴⁴ Alioze yami ngunanwambulwila ngwami, zangenu akwa kole jenu, lembelenu waze akunuhungumiona,

⁴⁵ hanga nukabwe ana ja Tatenu wa mwilu. Mumu kakuvumbula tangwa lienyi hali abi ni abema; kakunokesa vula hali akwa ululi ni hali yingulungulu.

⁴⁶ Nyi nwakuzanga lume waze akunuzanga, chawana chika nwakusa mbunge ha kutambula? Akwa kulambwisa lijimu no keeshi kulinga chizechene, nyi?

⁴⁷ Nyi nwakumeneka tusendo twenu wika, nwakulinga kanawa kuhiana akwo, nyi? Atu waze hi Ayuda ko keeshi kulinga chizechene, nyi?

⁴⁸ Bwenu angunu mu ululi ngwe chize abwa Tatenu wa mwilu mungunu.”