Mateu 3 - Mukanda Wa Zambi 1970

Yoano Chipapachisa yambujola

¹ Ha matangwa waze Yoano Chipapachisa yeza, yabutuka kwambujola mu puya ya Yudea ngwenyi:

² “Alumukenu ku mbunge, mumu Wanangana wa mwilu hiwakundama.”

³ Yoano, mwenawo ambulwile mukwa munanyi wa Zambi Izaya ngwenyi: “Mutambi wa mutu yoze wakukololoka mu puya ngwenyi: ‘Lulikenu jila ya Mwene, Iulamisenu yikoka yenyi.’ ”

⁴ Yoano te kakuzala mahina a kulinga ni mona ja kashitu munene, kamelu, ni muya wa kubu mu zalilo yenyi. Yalialia makumbi ni wuchi wa mu yambu.

⁵ Akwa Yerusaleme, ni akwa Yudea eswe, ni akwa chifuchi cheswe te chasulangana ni lwiji Yordau yeezaza kuli Yoano.

⁶ Yaashikisa milonga yo, mba Yoano yaapapachisa papachisa mu lwiji Yordau.

⁷ Ha kumona Afariseu ni Asaduseu anji kaanezaza hanga aapapachise, Yoano yaahula ngwenyi: “Yenu, vungu lia yihili, iya unakanutoweza kuchina ufwatulo wa Zambi uze muukeza?

⁸ Lingenu yitanga yize muyilweza ngwo, hinwalumuka ku mbunge.

⁹ Kanda nunyonga ni kulisamba ngwenu: ‘Abrahama kali kashakulu ketu,’ mumu ngunanwambe ngwami, Zambi mahasa kwalumuna mawe wano ni kwapwisa vungu lia Abrahama

¹⁰ Zambi hasa kulu njimbu ku miji ya mitondo. Mutondo weswe uze kuushi kwima mihuko yibema maupakula ni kuumbila mu kahia.

¹¹ Yami ngunanupapachisa ni meya mu kulweza ngwo, hinwalumuka ku mbunge. Alioze yoze meza kunyima liami makanupapachisa ni Mwiku wa Linanga ni kahia. Kananguhiana yami. Chatelele nichimwe kujitula sapato jenyi.

¹² Kali ni lwalo mu kwoko lienyi wa kufuza nacho mbuto. Makakungila tiriku yenyi mu chila, alioze yizungu makayocha mu kahia kaze kukeshi kujima nichimwe!”

Yoano yapapachisa Yesu

¹³ Hohene Yesu yakatuka ku chifuchi cha Galilea, yeza ku lwiji Yordau kuli Yoano hanga amupapachise.

¹⁴ Yoano yamukanda ngwenyi: “Chatamba yena ungupapachise yami, kuchi uneza kuli yami?”

¹⁵ Alioze Yesu ngwenyi: “Chitayize haliabwila. Mumu Chenacho chatutamba kumanununa ululi weswe.” Mba Yoano yamutayiza.

¹⁶ Muze Yoano hamupapachisa, Yesu yatutuka mu meya. Ha shimbu lizeliene mwilu yimwazulukila. Neye yamona Mwiku wa Zambi nikumuhulumukina ngwe liembe.

¹⁷ Yevwa liji mwilu ngwo: “Yono mwe Mwanami yoze nakuzanga kuhiana, nakuwahilila nenyi.”